ბესელია: მე, როგორც ადვოკატი, ვიცავდი ბიძინა ივანიშვილს და მას არ დავუპირისპირდები

მმართველ გუნდთან დაპირისპირებლმა ეკა ბესელიამ საფრანგეთიდან დაბრუნების შემდეგ პრესკონფერენცია პარლამენტში გამართა და განაცხადა, რომ მოსამართლეების საკითხი საერთო ხედვის ნაწილი გახდა და უკვე მეორეხარისხოვანია, ვინ არ ეთანხმებოდა და ვინ ეთანხმებოდა სიას. დაანონსების მიუხედავად, ბესელიას მწვავე შეფასებები არ გაუკეთებია და აქცენტი მოსამართლეების სიასთან დაკავშირებით “მიღწეულ შედეგზე” გააკეთა, თუმცა აღნიშნა, რომ არ იქნება იმ საპარლამენტო უმრავლესობის წევრი, რომლიც არსებულ სიას მისცემს ხმას.

“ჯანსაღი, კარგი პროცესი – მივესალმები, რომ საერთო ხედვის ნაწილი გახდა – მეორეხარისხოვანია ვინ ეთანხმებოდა, ვინ არ ეთანხმებოდა და ვინ ვის რას დააბრალებს. ნაკლებად მაინტერესებს, ვინ დაიბრალებს ამ შედეგს, მთავარია, რომ ეს სია შეჩერდა. ვერ მოხდება ამ სიის მიღება. მთავარია, ახლა შემუშავდეს ისეთი ცვლილებები, რომელიც გარანტიას შექმნის, რომ ვერ იქნებიან წარმოდგენილი ის მოსამართლეები, რომლებიც ემსახურებოდნენ სააკაშვილის რეჟიმს”,განაცხადა ბესელიამ.  

მისივე თქმით, “ოთახში ვერ გამოიკეტება და ყურში ჩურჩულით ვერ გადწყდება ისეთი საკითხები, რომელიც ეხება თითოელ მოქალაქეს”. რაც შეეხება შეკითხვას იმის შესახებ, “რატომ მოერიდა ივანიშვილის წინააღმდეგ დარტყმას”, ბესელია ასე პასუხობს:

“არასოდეს ვიხევ უკან – არც ახლა ვაპირებ უკა დახევას, ვთქვი ის, რაც მიმაჩნდა, რომ არის მთავარი. ჩემი პროფესიული საჯარო ეთიკა არასოდეს მაძლევდა იმის უფლებას, რომ დავპირისპირებოდი იმ ადამიანებს, რომლებსაც ვიცავდი და მე როგორც ადვოკატი ვიცავდი ბიძინა ივანიშვილს. თუმცა გუნდის შიგნით არასოდეს მოვრიდებივარ ჩემი მოსაზრების დაფიქსირებას, მათ შორის ივანიშვილთან”, აცხადებს ბესელია.

როგორც ცნობილია, საფრანგეთში ვიზიტის დროს, როდესაც ჟურნალისტებმა ივანიშვილის განცხადებაზე პასუხის გაცემა სთხოვეს, ბესელიამ ასეთი კომენტარი გააკეთა:

“რა სიმბოლურია რომ ახლა ვიმყოფები ევროსასამართლოს მოსამართლეთა არჩევის ევროსაბჭოს საპარლამენტო კომიტეტის სხდომაზე სადაც სტრასბურგის მოსამართლეთა შერჩევაზე უნდა ვიმსჯელოთ და საქართველოში ვერ ვთანხმდებით რომ უნდა არსებობდეს გამართული სტანდარტები და კრიტერიუმები. რაც შეეება ამ განცხადებას რაც გავრცელდა პარტიის თაჯდომარის სახელით. ორშაბათს ვისაუბრებ და ნათელს მოვფენ ყველაფერს!!! მე დარწმუნებული ვარ საზოგადოება სიმართლეს გაიგებს და დარწმუნებული ვარ ამ ბრძოლის სიმართლეშიც”.