ბაქოში დაკავებულ რუსეთის რვა მოქალაქეს, რომლებსაც ბრალად ედებოდათ „ირანიდან ნარკოტიკების ტრანზიტი და გავრცელება“ და „კიბერთაღლითობა“, პატიმრობა მიუსაჯეს. ამის შესახებ პარასკევს, 19 ივნისს, Telegram-ში გამოცემა Minval Politika-მ და სოციალურ ქსელ X-ში გამოცემა „აგენტსტვომ“ გაავრცელეს ინფორმაცია.
სერგეი სოფრონოვს, ანტონ დრაჩევს, დმიტრი ბეზუგლისა და ვალერი დულოვს თითოეულს ოთხ-ოთხი წლით თავისუფლების აღკვეთა მიესაჯა.
დმიტრი ფედოროვს, ბორის ტიმოშოვს, ალექსეი ვასილჩენკოსა და ილია ბეზუგლის — სამ-სამი წლით.
ერთ-ერთი მსჯავრდებულის ნათესავის თქმით, ეს პირველი ინსტანციის განაჩენია. მისი თქმით, ნათესავებს ახლა „სრული გაუგებრობა აქვთ, რა მოხდება შემდეგ“. კითხვაზე, გაასაჩივრებენ თუ არა მსჯავრდებულები განაჩენს, „აგენტსტვოს“ თანამოსაუბრემ უპასუხა: „ეს საუკეთესო ვარიანტი არ არის. ეს დროის კიდევ უფრო გაჭიანურებაა, მაგრამ აპელაციის არ შეტანაც შეუძლებელია“.
„აგენტსტვოს“ მტკიცებით, ბრალდებულების უმეტესობა, მათსა და მათ ახლობლების მიმართ ძალადობის მუქარით, აიძულეს, ნარკოტიკების შეძენის შესახებ ცრუ ჩვენებები მიეცათ.
სასამართლო აპრილიდან მიმდინარეობდა.
რუსეთის მოქალაქეების სასამართლო პროცესი 3 აპრილიდან გრძელდებოდა. პირველი განაჩენები აპრილში გამოცხადდა. მაშინ ბაქოს სასამართლომ ეკატერინბურგელ ალექსანდრ ვაისეროს ოთხი წლით თავისუფლების აღკვეთა მიუსაჯა „დანაშაულებრივი გზით მიღებული თანხების ლეგალიზაციის“ საქმეზე.
მაისის შუა რიცხვებში სასამართლომ რუსეთის მოქალაქეებს — იგორ ზაბოლოტსკიხსა და ილნურ ვალიტოვს — სამ-სამი წლით პატიმრობა მიუსაჯა.
რუსეთის მოქალაქეები ბაქოსა და მოსკოვს შორის კონფლიქტის გამწვავების ფონზე დააკავეს. დაძაბულობა უკავშირდებოდა ეკატერინბურგში აზერბაიჯანული დიასპორის წარმომადგენლების მასშტაბურ დაკავებებს, მათთვის ორგანიზებულ დანაშაულში ბრალდების წარდგენის გამო.
რუსეთსა და აზერბაიჯანს შორის კონფლიქტი
აზერბაიჯანსა და რუსეთს შორის დიპლომატიური კონფლიქტი 2024 წლის დეკემბერში AZAL-ის სამგზავრო თვითმფრინავის ჩამოვარდნის შემდეგ გამწვავდა.
კრიზისის ახალი ეტაპი 2025 წლის ივნისის ბოლოს დაიწყო, როდესაც ეკატერინბურგში ძველი სისხლის სამართლის საქმეების გამოძიების ფარგლებში მასშტაბური დაკავებები ჩატარდა. დაკავებულებს შორის იყვნენ ძმები ჰუსეინ და ზიადდინ საფაროვები, რომლებიც დაკავებიდან მალევე გარდაიცვალნენ.
აზერბაიჯანის გენერალურმა პროკურატურამ საქმე „განზრახ მკვლელობის“ მუხლით აღძრა და მამაკაცების გარდაცვალებაში რუსეთის ძალოვანი სტრუქტურების თანამშრომლები დაადანაშაულა.
აზერბაიჯანელი სასამართლო-სამედიცინო ექსპერტების დასკვნის თანახმად, 60 წლის ჰუსეინ საფაროვს მრავლობითი მძიმე დაზიანებები აღენიშნებოდა. 55 წლის ზიადდინ საფაროვსაც სხეულზე მრავლობითი დაზიანებები დაუდგინდა.
2026 წლის 13 აპრილს ეკატერინბურგის სასამართლომ ურალში აზერბაიჯანული დიასპორის ყოფილ ხელმძღვანელს, შაჰინ შიხლინსკის, 24 წლით თავისუფლების აღკვეთა მიუსაჯა.
სასჯელი ორი განაჩენის ერთობლიობით განისაზღვრა — 2001 და 2011 წლებში მკვლელობისა და მკვლელობის მცდელობის საქმეებზე, ასევე სამართალდამცველის მიმართ ძალადობის გამოყენების ბრალდებით.
