სიცილიის ერთ-ერთი მუზეუმიდან შაბათს რენესანსის ეპოქის ოთხი ნახატი მოიპარეს, რომლებსაც სპეციალისტები უზარმაზარ მხატვრულ და ისტორიულ ღირებულებას ანიჭებენ.
ქურდობის ფაქტი კვირას იტალიის კულტურის მინისტრმა ალესანდრო ჯიულიმ დაადასტურა. მისი თქმით, მესინის რეგიონული ინტერდისციპლინარული მუზეუმიდან მოიპარეს „სან-გრეგორიოს პოლიპტიქის“ სამი ნაწილი, ასევე ერთი დაფის ორივე მხარეს შესრულებული ნამუშევრები — „მადონა ყრმით“ და „ქრისტე პიეტაში“.
ყველა ეს ნამუშევარი XV საუკუნის მხატვრის, ანტონელო და მესინას შექმნილად მიიჩნევა.
მუზეუმის დირექტორის, მარისა მერკურიოს თქმით, ძარცვა შაბათს, ადგილობრივი დროით დაახლოებით 21:50 საათზე მოხდა.
„შოკირებულები ვართ. ეს უზარმაზარი დანაკარგია როგორც მუზეუმისთვის, ისე ქალაქისთვის, ჩვენი საზოგადოებისა და მთელი ხელოვნების სამყაროსთვის“, — ციტირებს მერკურიოს იტალიური სააგენტო ANSA.
პოლიცია არკვევს, როგორ მოახერხეს მძარცველებმა მუზეუმში შეღწევა ისე, რომ განგაშის სიგნალიზაცია არ ამოქმედებულა.
ANSA-ს ინფორმაციით, გამოძიების მთავარი ვერსიაა, რომ ნახატები შეკვეთით, შავი ბაზრისთვის მოიპარეს.
ყველა მოპარული ნამუშევარი ხის დაფებზეა შესრულებული. შესაბამისად, მძარცველებს მათი დახვევა და მარტივად გატანა არ შეეძლოთ, როგორც ეს ხშირად ტილოზე შესრულებული ნახატების შემთხვევაში ხდება.
ანტონელო და მესინა — ადრეული რენესანსის ერთ-ერთი ცნობილი ოსტატი — სიცილიაში დაიბადა და გაიზარდა.
„სან-გრეგორიოს პოლიპტიქი“ მან 1473 წელს შექმნა. რამდენიმე ნაწილისგან შემდგარ კომპოზიციაზე გამოსახულია ღვთისმშობელი ყრმა იესოთი ხელში, მის ორივე მხარეს — წმინდა გრიგოლი და წმინდა ბენედიქტე, ხოლო სხვა ნაწილებზე — რამდენიმე ანგელოზი.
ეს პოლიპტიქი, რომლისგანაც ძარცვამდე ხუთი ნაწილი იყო შემორჩენილი, ანტონელომ ერთ-ერთი მონასტრის დაკვეთით შექმნა.
ორმხრივი ნამუშევარი, რომლის ერთ მხარეს ღვთისმშობლის ხელში მყოფი ყრმა იესოა გამოსახული, ხოლო მეორე მხარეს — „ქრისტე პიეტაში“, სავარაუდოდ, დაახლოებით იმავე პერიოდში შეიქმნა, თუმცა ზუსტი თარიღი უცნობია.
ეს უკანასკნელი ნამუშევარი მცირე ზომისაა, რაც სპეციალისტებს აფიქრებინებს, რომ ის დამკვეთის პირადი ლოცვისთვის იყო შექმნილი.
მესინის მერმა ფედერიკო ბაზილემ განაცხადა, რომ დანაშაულით ღრმად აღშფოთებულია.
„ეს არის თავდასხმა მემკვიდრეობაზე, რომელიც მესინის ყველა მცხოვრებს ეკუთვნის. მესინა არავის მისცემს უფლებას, მისი ისტორია მოიპაროს“, — განაცხადა მერმა.
სულ ორი დღით ადრე იტალიის პოლიციის ხელოვნების ნიმუშებთან დაკავშირებულ დანაშაულებთან ბრძოლის დეპარტამენტმა განაცხადა, რომ აღმოაჩინა სამი ცნობილი ფრანგი მხატვრის ნამუშევარი, რომლებიც მარტში პარმასთან მდებარე მუზეუმიდან მოიპარეს.
სეზანის, რენუარისა და მატისის ეს სამი ნახატი საერთო ჯამში დაახლოებით 9 მილიონ ევროდ არის შეფასებული. მძარცველებმა ისინი მუზეუმიდან რამდენიმე წუთში გაიტანეს, ხოლო ამოქმედებულმა სიგნალიზაციამ მათ უფრო მეტი ნამუშევრის მოპარვაში შეუშალა ხელი.
ევროპის მუზეუმებში ფასდაუდებელი ხელოვნების ნიმუშების დაცვის ხარისხთან დაკავშირებით კითხვები გასული წლის ოქტომბერში ლუვრის გახმაურებული ძარცვის შემდეგაც გაჩნდა. მაშინ მძარცველები დღისით, სამშენებლო ამწის დახმარებით, პარიზის მთავარ მუზეუმში მეორე სართულის ფანჯრიდან შევიდნენ და რვა ფასდაუდებელი ნივთი — ნაპოლეონის, საფრანგეთის იმპერატრიცებისა და დედოფლების ძვირფასეულობა — გაიტანეს.