რუსეთის ხელისუფლებას სურს, რომ ერთიან მონაცემთა ბაზაში გაერთიანდეს არა მხოლოდ დაგეგმილი მგზავრობების შესახებ ინფორმაცია, როგორც ეს 2024 წლიდან უკვე ხდება, არამედ ფაქტობრივი მონაცემებიც — როგორც რეგულარული, ისე ჩარტერული რეისების შესახებ, წერს „ვერსტკა“.
რუსეთის ხელისუფლება გააძლიერებს კონტროლს მოქალაქეების გადაადგილებაზე როგორც ქვეყნის შიგნით საქალაქთაშორისო ტრანსპორტით მგზავრობისას, ისე საზღვრის კვეთის დროს. ამის შესახებ მიუთითებს მგზავრთა პერსონალური მონაცემების ავტომატიზებული ცენტრალიზებული ბაზების წარმოების პროექტი, რომელიც ნორმატიული სამართლებრივი აქტების პროექტების ფედერალურ პორტალზე გამოქვეყნდა.
მონაცემთა ბაზაში გადაიცემა არა მხოლოდ დაგეგმილი მგზავრობების შესახებ ინფორმაცია, როგორც ეს 2024 წლიდან უკვე ხდება, არამედ ფაქტობრივი მონაცემებიც — როგორც რეგულარული, ისე შეკვეთილი, ანუ ჩარტერული რეისების შესახებ, წერს 15 აგვისტოს გამოცემა „ვერსტკა“.
თითოეულ მგზავრობას უნიკალური კოდი მიენიჭება
უკვე ახლა მონაცემთა ბაზებში ინახება ინფორმაცია ბილეთის შეძენის, თანხის დაბრუნების, ბილეთის გადაფორმების, მგზავრის ჩასხდომისა და ჩამოსვლის, ასევე ტრანსპორტის გამგზავრების ან რეისის გაუქმების შესახებ.
გამოცემის ცნობით, იქვე ფიქსირდება მგზავრების პირადი ტელეფონის ნომრები, ელექტრონული ფოსტის მისამართები, პირადი ანგარიშების ლოგინები და პაროლების ჰეშ-მნიშვნელობები, IP-მისამართები, ასევე ინფორმაცია იმ საბანკო ბარათებისა და ანგარიშების შესახებ, რომლებიც ბილეთის შესაძენად გამოიყენეს.
ახლა ავიარეისების შემთხვევაში მონაცემებს დაემატება ინფორმაცია გადაჯდომებისა და ბარგის პარამეტრების შესახებ. გარდა ამისა, ყველა სახის ტრანსპორტით განხორციელებულ თითოეულ მგზავრობას უნიკალური კოდი მიენიჭება.
მონაცემთა ბაზებზე წვდომა, მათ შორის, რუსეთის შინაგან საქმეთა სამინისტროსა და ფედერალურ უსაფრთხოების სამსახურს — FSB-ს აქვთ.
ექსპერტები: სიახლეს კონკრეტული ადამიანების მოსაძებნად გამოიყენებენ
იურისტი და ქვეყნიდან წასული რუსების დახმარების პროექტ „კოვჩეგის“ დამფუძნებელი ანასტასია ბურაკოვა მიიჩნევს, რომ განახლებულ ინფორმაციას ძალოვანი უწყებები ოპერატიულ-სამძებრო ღონისძიებებისთვის გამოიყენებენ, მათ შორის კონკრეტული ადამიანების ძებნის შემთხვევაში.
„პირველი განყოფილების“ ადვოკატი ევგენი სმირნოვი ფიქრობს, რომ პროექტი პირველ რიგში მიმართულია სისხლის სამართლის საქმეების ფიგურანტების, მსჯავრდებულებისა და იმ პირების წინააღმდეგ, რომელთა მიმართაც ოპერატიულ-სამძებრო ღონისძიებები მიმდინარეობს.
სმირნოვის თქმით, გადაადგილების შესახებ ინფორმაციის თვალყურის დევნება შესაძლებელი იქნება პრაქტიკულად რეალურ დროში, მინიმალური დაყოვნებით.
ამასთან, ორივე ექსპერტი მიიჩნევს, რომ სისტემა შესაძლო მობილიზაციისთვის არ იხვეწება.
„ამისთვის ისედაც ყველაფერი მზად არის — ქვეყნიდან გასვლის ავტომატური აკრძალვა და მართვის მოწმობების გაუქმება“, — განაცხადა „პირველი განყოფილების“ წარმომადგენელმა