უკრაინის იერიშის შედეგად რუსეთის 51-ე საერთო-საჯარისო არმიის მეთაური, გენერალ-ლეიტენანტი სერგეი მილჩაკოვი მოკლეს. ამის შესახებ ინფორმაციას, გამოცემა Kyiv Independent-ი იუწყება.
უკრაინელებმა, ოკუპირებულ დონეცკის ოლქში რუსეთის სამხედრო სამეთაურო პუნქტს 26 აგვისტოს დაარტყეს, რასაც გავრცელებული ცნობებით, მილჩაკოვი ზუსტ დარტყმას ემსხვერპლა. 27 აგვისტოს უკრაინის გენერალურმა შტაბმა დაადასტურა აღნიშნული იერიში. უკრაინის თავდაცვის სამინისტრომ კი მაშინ განაცხადა განაცხადა, რომ ზუსტმა დარტყმებმა გაანადგურა რუსეთის შენიღბული სარდლობის პუნქტები დონეცკში, ხოლო ინფორმაცია რუსი ოფიცრების “მძიმე დანაკარგების” შესახებ ჯერ კიდევ ზუსტდებოდა.
მანამდე, პროპაგანდისტული გამოცემა Daily Storm-ის დამფუძნებელმა, ანასტასია კაშევაროვამ განაცხადა, რომ “ფრონტმა ერთ-ერთი გმირი დაკარგა.” მისი თქმით, მოწინააღმდეგემ დარტყმა ზუსტად განახორციელა, რაც ადგილმდებარეობის შესახებ შიდა ინფორმაციის გაჟონვაზე მიუთითებს.მოგვიანებით კაშევაროვამ დააზუსტა, რომ დაღუპულის შესახებ დეზინფორმაცია ვრცელდება და საზოგადოებას მოუწოდა ოფიციალურ განცხადებას დაელოდონ. გენერალ სერგეი მილჩაკოვის გარდაცვალების ცნობის პარალელურად, Z-ბლოგერმა ასლან რუბაევმა და სამხედრო კორესპონდენტმა იური კოტენოკმა შეცდომით გამოაქვეყნეს ინფორმაცია “რუსიჩის” მეთაურის, ალექსეი მილჩაკოვის დაღუპვის შესახებ.
მილჩაკოვის შესაძლო სიკვდილზე საუბრისას რუსულმა დამოუკიდებელმა გამოცემამ Vazhnye Istorii-მ განაცხადა, რომ დადასტურების შემთხვევაში ის უკრაინის წინააღმდეგ ომში მოკლული 23-ე რუსი გენერალი იქნება.
მილჩაკოვის ძალები დონეცკის ოლქში, მათ შორის, ავდიივკის, ნიუ-იორკისა და სხვა დასახლებების მიმართულებებზე მოქმედებდნენ. რუსული მედიის ცნობით, მას 2024 წელს რუსეთის გმირის წოდებაც მიენიჭა.
რუსეთს მილჩაკოვის სიკვდილი ოფიციალურად არ დაუდასტურებია.