უკრაინის გენერალურმა პროკურორმა რუსლან კრავჩენკომ ეროვნული ანტიკორუფციული ბიუროს (NABU) დირექტორს, სემიონ კრივონოსს ოფიციალურად წარუდგინა ბრალი სამსახურებრივი დოკუმენტების გაყალბებისა და ფიქტიური შვილად აყვანის ორგანიზების მუხლებით, რათა კონკრეტულ პირებს სამხედრო მობილიზაციისთვის აერიდებინათ თავი. ბრალის წარდგენიდან რამდენიმე საათში, თანამდებობიდან გადადგომის რეჟიმში მყოფმა გენპროკურორმა სამსახურებრივი ავტომანქანით უკრაინის საზღვარი გადაკვეთა და ქვეყანა დატოვა, თუმცა თქვა, რომ ეს „ლიეტუვაში მივლინება“ იყო.
კრიზისი მიმდინარე წლის 4 სექტემბერს დაიწყო, როდესაც ანტიკორუფციულმა ბიურომ და სპეციალიზებულმა ანტიკორუფციულმა პროკურატურამ (SAPO) გენერალურ პროკურატურაში მასშტაბური ჩხრეკა ჩაატარეს. სპეცოპერაცია „კართაგენის“, ფარგლებში თაღლითური ქოლცენტრების მფარველობისა და 89 მილიონზე მეტი გრივნის გათეთრების ბრალდებით დააკავეს პროკურატურის მაღალჩინოსანი სერგეი კროპივა, რომელიც კრავჩენკოს უახლოესი გარემოცვის წევრია.
გამოქვეყნებულ ფარულ ჩანაწერებში თავად გენპროკურორის კორუფციული კავშირებიც იკვეთებოდა, რის ფონზეც 7 სექტემბერს კრავჩენკომ თანამდებობის დატოვების შესახებ განცხადება დაწერა. თუმცა, სანამ უმაღლესი რადა მის გადადგომას ოფიციალურად დაამტკიცებს, კრავჩენკომ საპასუხო ვიდეომიმართვა გაავრცელა და NABU-ს დირექტორს ბრალი დასდო. მისი მტკიცებით, ანტიკორუფციული უწყების რეიდის რეალური მიზანი იყო პროკურატურაში დაცული იმ საქმეების მასალების მოპარვა, რომლებსაც მისი უწყება თავად ანტიკორუფციონერების წინააღმდეგ აწარმოებდა.
მოვლენებს გამოეხმაურა პრეზიდენტი ვოლოდიმირ ზელენსკი, რომელმაც საჯაროდ მოითხოვა გენერალური პროკურორის სასწრაფო გადაყენება და აღნიშნა, რომ კრავჩენკოსთვის პოსტის დატოვების გარდა სხვა გზა აღარ არსებობს, რადგან უკრაინამ ყველა მიზეზი საკუთარი თვალით ნახა.
პარალელურად, ანტიკორუფციულმა ბიურომ (NABU) და SAPO-მ ერთობლივი განცხადება გაავრცელეს, სადაც კრავჩენკოს ბრალდებები კატეგორიულად უარყვეს, უწოდეს ამას საჯარო პიარ-კამპანია და განმარტეს, რომ სემენ კრივონოსს ოფიციალურად არანაირი ბრალის წარდგენის დოკუმენტი არ ჩაბარებია.