ივანიშვილისგან ვიღებთ რჩევებს, საკითხებს ერთად განვიხილავთ. ირაკლი კობახიძემ ბიძინა ივანიშვილის შესახებ კიდევ ერთხელ ისაუბრა. კობახიძემ კვლავ გაიმეორა, რომ ივანიშვილი პოლიტიკურ პროცესებში აქტიურადაა ჩართული.
“ბიძინა ივანიშვილთან ძალიან ხშირი კომუნიკაცია მაქვს. დღესაც ვესაუბრე. ის საქართველოშია, როგორც მთელი ამ წლების განმავლობაში. ჩვენ [ბიძინა ივანიშვილისგან] ძალიან ხშირად ვიღებთ რჩევებს, საკითხებს ერთად განვიხილავთ. ის, როგორც ჩვენი გუნდის ლიდერი, პოლიტიკურ პროცესებში აქტიურადაა ჩართული. ისევე როგორც მთლიანად მმართველი გუნდი, მისი ლიდერიც ქართველი ხალხის მიმართაა ანგარიშვალდებული. ისევე როგორც მთლიანად გუნდი, თითოეული ჩვენგანი, რა თქმა უნდა, გუნდის ლიდერიც მთლიანად იზიარებს პასუხისმგებლობას იმ პროცესებზე, რაც ქვეყანაში წარიმართება […] ბიძინა ივანიშვილი დღესაც უაქტიურეს პოლიტიკაშია. ის დღესაც ბოლომდეა ჩართული პროცესებში. მას ფორმალურ სახელისუფლებო თანამდებობაზე ყოფნის ინტერესი არასოდეს ჰქონია – მათ შორის, არც მაშინ, როცა ფორმალურ საჯარო თანამდებობას იკავებდა. […] ერთპიროვნულად გადაწყვეტილებები საერთოდ არ მიიღება. მთავრობაში არც მე ვიღებ ერთპიროვნულად რაიმე გადაწყვეტილებას და არც მთლიანად ჩვენს პოლიტიკურ გუნდში, მათ შორის, არც ბიძინა ივანიშვილი არ იღებს – ჩვენთან არცერთი გადაწყვეტილება ერთპიროვნულად არ მიიღება. ყველა გადაწყვეტილება მსჯელობას ეფუძნება. თუ საგანგებო მნიშვნელობის საკითხებია, ბატონ ბიძინა ივანიშვილთან ერთად ვიკრიბებით ხოლმე, ერთად ვმსჯელობთ და ერთად ვიღებთ გადაწყვეტილებებს”. – ამბობს კობახიძე.