ბოლო ერთი თვის განმავლობაში პირველად პრეზიდენტ დონალდ ტრამპსა და ვლადიმირ პუტინს შორის კომუნიკაცია შედგა. ორი ქვეყნის პრეზიდენტების საუბარს წინ უძღვოდა ამერიკის, დიდი ბრიტანეთის და კანადის განცხადებები იმის შესახებ, რომ რუსეთი კოვიდ19-ის საწინააღმდეგო ვაქცინის მოპარვას ჰაკერული თავდასხმებით ცდილობდა. ამის გამო, რუსეთს ევროკავშირმა სანქციები დააკისრა. თუმცა, უცნობია ისაუბრეს თუ არა ამ საკითხის შესახებ პრეზიდენტებმა.
მედიისთვის არსებული ინფორმაციით, სატელეფონო ზარის დროს ამერიკის შეერთებული შტატების პრეზიდენტმა და რუსეთის პრეზიდენტმა კოვიდ19-ის პანდემიის, ირანის და ბირთვული შეთანხმების შესახებ გაცვალეს მოსაზრებები.
თეთრი სახლის მიერ გავრცელებული ინფორმაციის თანახმად, პანდემიასთან ერთად პრეზიდენტებმა განიხილეს მსოფლიო ეკონომიკის გახსნის თემაც. კრემლის მიერ გავრცელებული ინფორმაციით, კი პრეზიდენტებმა სურვილი გამოთქვეს, რომ აშშ-სა და რუსეთს შორის ვაჭრობა და ეკონომიკური ურთიერთობა განვითარდეს.
სატელეფონო საუბრის დროს პრეზიდენტმა ტრამპმა იმედი გამოთქვა, რომ ამერიკას, რუსეთსა და ჩინეთს შორის შეიარაღებაში შეჯიბრი თავიდან იქნება აცილებული და იმედს გამოთქვამს, რომ ვენაში მიმდინარე ბირთვული შეიარაღების შესახებ მოლაპარაკებები შედეგს გამოიღებს.
საერთაშორისო მედია კი ავრცელებს ინფორმაციას, რომ სატელეფონო საუბრის დროს პრეზიდენტებმა ირანის შესახებაც ისაუბრეს. კერძოდ ყურადღება გაამახვილეს ირანის ბირთვულ პროგრამებზე.
წყარო: ამერიკის ხმა