ევროსაბჭოს ადამიანის უფლებათა დაცვის კომისარი მაიკლ ო’ფლაერტი საქართველოში ადამიანის უფლებათა მდგომარეობას კვლავ კრიტიკულად აფასებს და „ქართულ ოცნებას“ რეპრესიული კანონმდებლობის გაუქმებისკენ მოუწოდებს. ამის შესახებ კომისრის ახალ ანგარიშშია აღნიშნული, რომელიც მიმდინარე წლის აპრილში საქართველოში ვიზიტის შემდეგ გამოაქვეყნა.
ანგარიშში ასევე გაკრიტიკებულია ოპოზიციური პარტიების აკრძალვის მცდელობა და მედიაზე ზეწოლა; საუბარია „ბათუმელებისა“ და ნეტგაზეთის დამფუძნებლის, მზია ამაღლობელის საქმეზე; მაიკლ ო’ფლაერტი, „ქართულ ოცნებას“ ჟურნალისტის გათავისუფლებისკენ მოუწოდებს. ძირითადი რეკომენდაციები კი ასეთია:
„უზრუნველყოფილ იქნას საკანონმდებლო ინიციატივის დროული მიღება და მისი პრაქტიკაში ეფექტიანი განხორციელება, რომლის მიხედვითაც ყველა სამართალდამცავ პირს ეკეთება მკაფიოდ ხილული, ინდივიდუალურად იდენტიფიცირებადი საიდენტიფიკაციო ნომერი; უზრუნველყოს, რომ მომიტინგეებისა და ჟურნალისტების წინააღმდეგ ჩადენილი ძალადობის ფაქტებზე პროკურატურის მიერ წარმოებული გამოძიებები იყოს სრულყოფილი, დროული და რეალურად დამოუკიდებელი, და მოიცავდეს არა მხოლოდ უშუალო შემსრულებელთა, არამედ ხელმძღვანელობის პასუხისმგებლობის საკითხების შესწავლასაც; გამოძიების ფარგლები გააფართოვოს 2023 წლის მარტის, 2024 წლის მარტი–მაისისა და 2024 წლის ნოემბრიდან 2025 წლის დასაწყისამდე გამართული საპროტესტო აქციების დროს არასათანადო მოპყრობის შესახებ ყველა სარწმუნო ბრალდებაზე; უზრუნველყოს მომიტინგეების წინააღმდეგ ქიმიური ნივთიერებების შემცველი წყლის ჭავლის გამოყენების საკითხის საფუძვლიანი, დამოუკიდებელი და გამჭვირვალე გამოძიება; გადახედოს, გააუქმოს ან არსებითად შეცვალოს 2025 წლის ოქტომბერსა და დეკემბერში მიღებული ცვლილებები „შეკრებებისა და მანიფესტაციების შესახებ“ კანონში, ადმინისტრაციულ სამართალდარღვევათა კოდექსსა და სისხლის სამართლის კოდექსში; დაუყოვნებლივ აღასრულოს ადამიანის უფლებათა ევროპული სასამართლოს გადაწყვეტილებები მშვიდობიანი შეკრების უფლების დარღვევისა და სამართალდამცავი ორგანოების მიერ არასათანადო მოპყრობის შესახებ.“
კომისარი „ქართულ ოცნებას“ ასევე მოუწოდებს: შეწყვიტოს სამოქალაქო საზოგადოების ორგანიზაციების მიმართ GEOFARA-სა და გრანტების შესახებ კანონის ფარგლებში დაწყებული მოკვლევები; შეწყდეს სამოქალაქო საზოგადოების ორგანიზაციების წინააღმდეგ სისხლის სამართლის საქმეები დამამძიმებელ გარემოებებში საბოტაჟში სავარაუდო მონაწილეობის ბრალდებით ან სულ მცირე დაუყოვნებლივ აღდგეს წვდომა ორგანიზაციების საბანკო ანგარიშებზე; გააუქმოს GEOFARA, 2024 წლიდან მიღებული ყველა ცვლილება „გრანტების შესახებ“ კანონში და „მაუწყებლობის შესახებ“ კანონში.