გამოცემა The Economist-ის ცნობით, რუსეთის პრეზიდენტმა ვლადიმირ პუტინმა ზაფხულში, რამდენიმეკვირიანი განხილვის შემდეგ, უკრაინაში ომის ესკალაციის გზა აირჩია. ამის შესახებ გამოცემას კრემლთან დაახლოებული წყაროები განუცხადეს.
გამოცემის ინფორმაციით, პუტინისთვის ომში მინიმალური მიზანი უკრაინის აღმოსავლეთით მდებარე დონბასის მთელი რეგიონის დაპყრობაა. ინფორმირებული წყაროს თქმით, ომის განმავლობაში პუტინმა თავისი გარემოცვის წევრებს განუცხადა, რომ ამ მიზნის მიუღწევლობის შემთხვევაშიც კი მისი სიცოცხლე საფრთხეში აღმოჩნდება — წყაროს ცნობით, მან თქვა: „ისინი ჩამომკიდებენ.”
The Economist წერს, რომ მისთვის ხელმისაწვდომი წყაროების თანახმად, პუტინი, სავარაუდოდ, ხელმძღვანელობს რეჟიმის „კრიმინალური ლოგიკით”, რომლის მიხედვითაც სისუსტის გამოვლენა დაუშვებელია, რადგან რუსეთის მმართველი სისტემა წარუმატებლობის მიმართ დაუნდობელია.
გამოცემის ცნობით, რუსეთის საზოგადოებაში ომის მიმართ მდუმარე თანხმობა თანდათან სუსტდება. დამოუკიდებელი Levada Centre-ის კვლევის მიხედვით, გამოკითხულთა 57% ქვეყანაში არსებულ ვითარებას „დაძაბულად” აფასებს; მიზეზებად სახელდება ომი, დაღუპულთა რაოდენობა, მობილიზაცია, დრონების თავდასხმები და მომავლის განცდის დაკარგვა.
The Economist-ის ინფორმაციით, უკმაყოფილება უფრო მკვეთრად არის გამოხატული რუსეთის ელიტაში, სადაც ერთ-ერთი წყაროს თქმით, ძირითადი პრობლემა აღარც ეკონომიკური მდგომარეობაა და აღარც სამხედრო წარმატების ნაკლებობა — თითქმის ხუთწლიანი ომი, შედეგის მიუხედავად, უკვე წარუმატებლობად აღიქმება.
გამოცემა დასძენს, რომ პუტინს ომის გასაგრძელებლად ამჟამად ჯერ კიდევ გააჩნია საკმარისი ეკონომიკური რესურსი და რეპრესიული აპარატი.