ვულკანის ამოფრქვევის გამო ინდონეზიის მთავარ საერთაშორისო აეროპორტში ასობით რეისი დროებით შეჩერდა. ჯაკარტის სუკარნო-ჰატას აეროპორტში ათიათასობით მგზავრი აღმოჩნდა ჩარჩენილი.
ადგილობრივი ხელისუფლების ინფორმაციით, კვირა დილით აეროპორტის მახლობლად, საჰაერო სივრცეში ანაკ-კრაკატაუს ვულკანის ფერფლის აღმოჩენის შემდეგ 209 რეისი გადაიდო ან შეფერხდა.
ვულკანმა, რომელიც იავისა და სუმატრის კუნძულებს შორის, სუნდას სრუტეში მდებარეობს, ამოფრქვევა პარასკევს გვიან საღამოს დაიწყო. ამას თან ახლდა უწყვეტი სეისმური აქტივობა და ლავის შადრევნების ამოფრქვევა. ხელისუფლების ცნობით, კვირა დილით კიდევ ორი ამოფრქვევა დაფიქსირდა.
აეროპორტი დროებით, ადგილობრივი დროით 13:30 საათამდე, არ ფუნქციონირებდა, რამაც პირდაპირ თუ ირიბად 22 ათასზე მეტი ადამიანი დააზარალა.
ტრანსპორტის სამინისტროს ინფორმაციით, ფრენების შეჩერებამ ყველაზე მეტად სინგაპურის მიმართულებით და სინგაპურიდან შესრულებულ რეისებზე იმოქმედა, ასევე სხვა საერთაშორისო მარშრუტებზე, მათ შორის დოჰის, სიდნეისა და კუალა-ლუმპურის მიმართულებით.
ხელისუფლებამ დაადასტურა, რომ ვულკანის ბოლო აქტივობასთან დაკავშირებით ცუნამის საფრთხე არ არსებობს.
ჯანდაცვის მინისტრმა დაზარალებული რეგიონების მცხოვრებლებს მოუწოდა, შენობებში დარჩნენ და ნიღბები გამოიყენონ.
ადგილობრივი გაზეთის, Kompas-ის ცნობით, შაბათს რამდენიმე სკოლაში სასწავლო პროცესი გაუქმდა მას შემდეგ, რაც მოსწავლეებმა და ადგილობრივმა მცხოვრებლებმა ვულკანური ფერფლის გამო თვალების გაღიზიანებაზე იჩივლეს. რამდენიმე მეთევზემაც ზღვაში გასვლა გადაიფიქრა, რადგან მათაც თვალების ტკივილი აწუხებდათ.
ერთ-ერთმა ადგილობრივმა მცხოვრებმა, ალდი ჩანდრა პრაიოგიმ, გამოცემას უთხრა, რომ პარასკევი საღამოდან ისეთი შეგრძნება აქვს, თითქოს „თვალებში ქვიშის წვრილი მარცვლები ჩაუვარდა“ და გაღიზიანების შესამცირებლად თვალის წვეთების გამოყენება უწევს.
მისი თქმით, მტვერი იმდენად სქელია, რომ სახლის წინა ეზოს ყოველ ხუთ წუთში ერთხელ გვა უწევს.
ვულკანი ანაკ-კრაკატაუ, რომლის სახელიც „კრაკატაუს შვილს“ ნიშნავს, პერიოდულად აქტიურდება მას შემდეგ, რაც გასული საუკუნის დასაწყისში ზღვიდან ამოიწია იმ კალდერაში, რომელიც 1883 წელს კრაკატაუს ცნობილი ამოფრქვევის შედეგად წარმოიქმნა.