ფლორიდის შტატში, მაიამის საერთაშორისო აეროპორტში, Amazon-ის კუთვნილი Boeing 767-ის ტიპის სატვირთო თვითმფრინავის ავარიის შედეგად სულ მცირე ხუთი ადამიანი დაიღუპა და კიდევ ხუთი დაშავდა. ამის შესახებ კვირას, 6 სექტემბერს, ადგილობრივი ოლქის სახანძრო სამსახურის უფროსმა რეი ჯადალამ განაცხადა. მისი თქმით, სამი დაშავებული კრიტიკულ მდგომარეობაში საავადმყოფოში გადაიყვანეს.
ხელისუფლების ინფორმაციით, პუერტო-რიკოდან მომავალი თვითმფრინავი დაშვებისას ასაფრენ-დასაფრენ ზოლს გასცდა, რამდენიმე გაჩერებულ ავტომობილს შეეჯახა და ცეცხლი გაუჩნდა. AFP-ის ცნობით, შეჯახების შედეგად რამდენიმე ადამიანი ავტომობილებში ჩაიჭედა.
ადგილობრივი სახანძრო სამსახურის უფროსის თქმით, სამაშველო ოპერაცია რთული იყო და მასში 60-ზე მეტი სახანძრო მანქანა მონაწილეობდა. მაშველებმა, მათ შორის, თვითმფრინავში ჩარჩენილი პირველი და მეორე პილოტების გამოყვანაც სცადეს. ჯადალას არ დაუკონკრეტებია, გადარჩნენ თუ არა ისინი.
ავარიის მიზეზი ჯერ უცნობია, რეისები გაუქმდა
ავარიის მიზეზი ჯერ უცნობია, რეისები გაუქმდაავარიის მიზეზებს ამჟამად აშშ-ის ფედერალური საავიაციო ადმინისტრაცია (FAA) და ტრანსპორტის უსაფრთხოების ეროვნული საბჭო (NTSB) იძიებენ. Flightradar24-ის მონაცემებით, ასაფრენ-დასაფრენი ზოლიდან გადასვლის მომენტში თვითმფრინავი დაახლოებით 207 კმ/სთ სიჩქარით მოძრაობდა. მოგვიანებით აეროპორტმა მუშაობა განაახლა, თუმცა მგზავრები შესაძლო შეფერხებების შესახებ გააფრთხილა.
ინციდენტის გამო აეროპორტმა ყველა ასაფრენ-დასაფრენი ზოლი დახურა. რამდენიმე საათის შემდეგ აეროპორტის ვებგვერდზე გამოქვეყნდა შეტყობინება, რომ მგზავრებმა რეისების შესაძლო გადადების შესახებ ინფორმაცია უშუალოდ ავიაკომპანიებთან უნდა გადაამოწმონ.
„ამჟამად ჩვენი ოთხი ასაფრენ-დასაფრენი ზოლიდან ორი ღიაა, თუმცა ამ ინციდენტის შედეგები აეროპორტის მუშაობაზე კვლავ აისახება. მგზავრებს ვურჩევთ, აეროპორტში გამგზავრებამდე რეისის სტატუსი უშუალოდ ავიაკომპანიასთან გადაამოწმონ“, — ნათქვამია აეროპორტის ვებგვერდზე გამოქვეყნებულ განცხადებაში.
Amazon-მაც გაავრცელა განცხადება, რომელშიც ნათქვამია, რომ თვითმფრინავს „დაშვებისას ინციდენტი“ შეემთხვა, თუმცა დამატებითი დეტალები არ დაუკონკრეტებია. კომპანიის პრესსპიკერის, კელი ნანტელის თქმით, Amazon „მჭიდროდ თანამშრომლობს ადგილობრივ ხელისუფლებასთან და შესაბამის უწყებებთან, რათა ზუსტად დადგინდეს, რა მოხდა“.
ღია წყაროების მონაცემებით, Boeing 767-33AER, რეგისტრაციის ნომრით N1997A, 1994 წელს იყო წარმოებული.
თავდაპირველად თვითმფრინავი ბელგიურ ავიაკომპანია Sobelair-ს გადაეცა, ხოლო 2016 წელს სატვირთო თვითმფრინავად გადააკეთეს.
ლაინერი მაიამის აეროპორტის 30-ე ასაფრენ-დასაფრენ ზოლზე უნდა დაშვებულიყო, რომლის სიგრძე 2 853 მეტრია. მთლიანობაში აეროპორტს ოთხი ასაფრენ-დასაფრენი ზოლი აქვს.
აშშ-ის ტრანსპორტის უსაფრთხოების ეროვნულმა საბჭომ (NTSB) განაცხადა, რომ ავარიის გამოძიებას აწარმოებს და შემთხვევის ადგილზე უკვე გააგზავნა საკუთარი სპეციალისტები.
მაიამის საერთაშორისო აეროპორტი, რომელიც თითქმის 100 წლის წინ, 1928 წელს გაიხსნა, ერთ-ერთი უმსხვილესი საავიაციო ჰაბია როგორც აშშ-ში, ისე მსოფლიოში — როგორც მგზავრთნაკადის, ასევე ტვირთბრუნვის თვალსაზრისით.
მაიამი ერთ-ერთი მთავარი ჰაბია იმ მგზავრებისთვისაც, რომლებიც ლათინური ამერიკისა და კარიბის ზღვის აუზის ქვეყნების მიმართულებით მიემგზავრებიან.