ჩეხეთის მმართველი კოალიცია, პრაღაში გამართული მასშტაბური საპროტესტო აქციებისა და მედიის წარმომადგენელთა გაფიცვის მიუხედავად, საზოგადოებრივი მაუწყებლის დაფინანსების რეფორმის გეგმას არ შეცვლის. ამის შესახებ პრემიერ-მინისტრმა ანდრეი ბაბიშმა 4 ნოემბერს განაცხადა. მთავრობის მეთაურის თქმით, ცვლილებების მიზანი მხოლოდ მოქალაქეებისთვის ფინანსური ტვირთის შემსუბუქებაა და პროცესი შეუფერხებლად გაგრძელდება.
პრემიერ-მინისტრის ამ განცხადებას წინ უძღოდა 3 ნოემბერს დაწყებული მწვავე საპროტესტო ტალღა. ქვეყნის საზოგადოებრივი ტელევიზიისა (Česká televize) და რადიოს (Český rozhlas) თანამშრომლები ერთდღიან გაფიცვაზე გავიდნენ, რის პარალელურადაც პრაღაში, ვენცესლასის მოედანზე, ათასობით მოქალაქე შეიკრიბა სიტყვის თავისუფლების დასაცავად.
უთანხმოების მთავარი მიზეზი ახალი კანონპროექტია, რომელიც რადიკალურად ცვლის მაუწყებლის დაფინანსების წესს. რეფორმის მიხედვით, უქმდება სპეციალური სააბონენტო მოსაკრებელი, რომელსაც ჩეხეთის მოსახლეობა და ბიზნესსექტორი პირდაპირ იხდიდა და რითაც მედიის პოლიტიკური დამოუკიდებლობა იყო გარანტირებული.
ახალი მოდელით კი, საზოგადოებრივი მაუწყებლის ბიუჯეტი პირდაპირ სახელმწიფო ხაზინაზე ხდება დამოკიდებული, ამასთანავე, დაფინანსების საერთო მოცულობა 15 პროცენტით მცირდება.
საერთაშორისო ორგანიზაციები, მათ შორის „რეპორტიორები საზღვრებს გარეშე“, აცხადებენ, რომ მედიის ბიუჯეტის მიბმა სამთავრობო ხაზინასთან ხელისუფლებას პირდაპირ ფინანსურ ბერკეტს აძლევს, რათა ზეგავლენა მოახდინოს კრიტიკულ სარედაქციო პოლიტიკაზე.
კრიტიკოსთა ნაწილი პარალელებს ავლებს მეზობელ უნგრეთსა და სლოვაკეთთან, სადაც მსგავსი რეფორმების შედეგად საზოგადოებრივი მედიასაშუალებები სამთავრობო კონტროლის ქვეშ მოექცნენ.
საზოგადოებრივი პროტესტი განსაკუთრებით მას შემდეგ გამწვავდა, რაც 24 ოქტომბერს, მმართველმა კოალიციამ საპარლამენტო დებატების შეზღუდვის ფონზე, კანონპროექტს პირველი მოსმენით კენჭი ღამის 04:36 საათზე უყარა. დემონსტრანტებმა ეს დრო ხელისუფლების მიერ გადაწყვეტილების ფარულად მიღების სიმბოლოდ აქციეს და აქციაზე შესაბამისი წარწერის მქონე პლაკატებით გამოვიდნენ.
ოპოზიციური პარტიები აცხადებენ, რომ კანონის საბოლოო მიღების შემთხვევაში გადაწყვეტილებას საკონსტიტუციო სასამართლოში გაასაჩივრებენ. სამოქალაქო მოძრაობებმა მომდევნო კიდევ უფრო მასშტაბური დემონსტრაციები პრაღაში 10 და 15 ნოემბრისთვის დააანონსეს.