დონალდ ტრამპი: ომის შემდეგ უკრაინას „რამდენადმე განსხვავებული ფორმა“ ექნება

ომის დასრულების შემდეგ უკრაინას „ოდნავ განსხვავებული ფორმა“ ექნება. ეს მოსაზრება აშშ-ის პრეზიდენტმა დონალდ ტრამპმა CBS News-ის გადაცემა 60 Minutes-ისთვის მიცემულ ინტერვიუში გამოთქვა. ინტერვიუ გადაცემის YouTube-არხზე ორშაბათს, 9 ნოემბერს გამოქვეყნდა.

უკრაინის მიერ ამერიკული იარაღის გამოყენებაზე საუბრისას ტრამპმა განაცხადა: „ბაიდენმა მათ 350 მილიარდი დოლარი ნაღდი ფულით მისცა და იარაღიც გადასცა. მე მათთვის არაფერი მიმიცია. მე ეს ყველაფერი ევროპას მივაწოდე, სრული ფასით მივყიდე და ისინიც გვიხდიან. და მარტო ეს კი არა — ის 350 მილიარდიც. ამის გამო ძალიან უსიამოვნო განცდა მქონდა, რადგან ეს სისულელედ მიმაჩნდა. ევროპას ფული აქვს. ევროპა მაშინაც გადაიხდიდა, მაგრამ ეს არავის უთხოვია. ასე რომ, ჩვენ მათ ერთი სახეობის იარაღის შემდეგ მეორეს ვაწვდიდით. სხვათა შორის, უკრაინას გამბედაობა ეყო, ეს იარაღი გამოეყენებინა. მის გამოყენებას გამბედაობა სჭირდება და უკრაინელებმა აჩვენეს, რომ ანგარიშგასაწევი ძალა არიან. თუმცა მათ მსოფლიოში საუკეთესო იარაღი ჰქონდათ. ჩვენ კი სანაცვლოდ არაფერი მიგვიღია“.

„უკრაინის დამოუკიდებლობა ხომ მივიღეთ?“ — შეეპასუხა ინტერვიუერი.

„ჯერ ეგეც არ მიგიღიათ. ჯერჯერობით არაფერი მიგიღიათ. ვნახოთ, რით დასრულდება ეს ყველაფერი. თუმცა იმედი მაქვს…“ — მიუგო ტრამპმა.

ინტერვიუერმა დააზუსტა, მოელის თუ არა ტრამპი, რომ „საბოლოოდ უკრაინა თავისუფალი და დამოუკიდებელი იქნება“. ტრამპმა უპასუხა: „ვფიქრობ, ამას შევძლებთ. ვფიქრობ, ასეც მოხდება და საბოლოოდ უკრაინას რამდენადმე განსხვავებული ფორმა ექნება“.

ტრამპი პუტინისა და ზელენსკის შესახებ

ინტერვიუს დასაწყისში, კითხვაზე, თუ რა იყო, მისი აზრით, მშვიდობის გზაზე ყველაზე დიდი დაბრკოლება, თეთრი სახლის ხელმძღვანელმა უპასუხა: „ეს იყო სიძულვილი ზელენსკისა და პუტინს შორის. ვფიქრობ, ისინი ძალიან ახლოს იყვნენ შეთანხმების მიღწევასთან…“

ტრამპმა კიდევ ერთხელ გაიმეორა, რომ 2022 წელს პრეზიდენტი თავად რომ ყოფილიყო, ომის დაწყების შანსი „ნულის ტოლი“ იქნებოდა.

კითხვაზე, ვის უფრო ენდობა — პუტინს თუ ზელენსკის, ტრამპმა უპასუხა: „მირჩევნია, ეს არ ვთქვა. თუმცა ორივესთან შემიძლია საერთო ენის გამონახვა“.

„ვფიქრობ, ეს ომი დასრულდება და თანაც მალე. (…) და ერთადერთი მიზეზი, რის გამოც ის დასრულდება, მე ვარ. პრეზიდენტ პუტინსა და პრეზიდენტ ზელენსკის ერთმანეთი წარმოუდგენლად სძულთ…“ — დასძინა დონალდ ტრამპმა.

ინტერვიუერმა ჰკითხა, რამდენად გასაგები იყო ზელენსკის ასეთი დამოკიდებულება, „თუ გავითვალისწინებთ, რომ მის ქვეყანაში შეიჭრნენ“. ტრამპმა უპასუხა: „კი, მაგრამ… როცა ისინი პირველად შეხვდნენ ერთმანეთს, რუსეთის მიმართ დიდი უპატივცემულობა გამოიჩინეს. ამაზე არაფერს ვიტყვი“.

ტრამპი უკრაინაში Starlink-ის მუშაობის შენელების შესახებ

როცა საუბარი შეეხო სატელიტური კავშირის სისტემის მუშაობის შენელებას, ტრამპმა ხაზგასმით აღნიშნა, რომ არ იცის, ვინ გასცა შესაბამისი განკარგულება. ამ სისტემას, Starlink-ს, უკრაინელი სამხედროები იყენებენ.

„არ ვიცი. იმის თქმა მინდა, რომ ეს ძალიან კარგი სისტემაა და შესაძლოა, მისი მუშაობა შეანელეს. იმის თქმა მინდა, რომ ეს არ ვიცი. ჩემთვის არ წარმოუდგენიათ მტკიცებულება, რომ მისი მუშაობა შეანელეს. ამ ომის შესახებ ბევრ სიცრუეს ავრცელებენ. თუმცა, როცა ამის შესახებ გავიგე, ის (Starlink-ის სისტემა — რედ.) აღადგინეს“.