რუსეთის თავდაცვის სამინისტრომ განაცხადა, რომ ერთი დღე-ღამის განმავლობაში თითქმის ათასი უკრაინული უპილოტო საფრენი აპარატი ჩამოაგდო. „აგენტსტვოს“ ცნობით, ეს ომის დაწყების შემდეგ ყველაზე მაღალი მაჩვენებელია.
„აგენტსტვოს“ გათვლით, ხუთშაბათს, 18 ივნისს, უკრაინამ ერთი დღე-ღამის განმავლობაში რუსეთის ობიექტების მიმართულებით რეკორდული რაოდენობის უპილოტო საფრენი აპარატი გაუშვა. გამოცემა ამას რუსეთის თავდაცვის სამინისტროს მონაცემებზე დაყრდნობით წერს.
„ამ დარტყმამ არა მხოლოდ მოხსნა უკრაინის წინა რეკორდი დღე-ღამის განმავლობაში გამოყენებული დრონების რაოდენობით, არამედ გადააჭარბა იმ მაქსიმალურ რაოდენობასაც, რამდენი უპილოტო საფრენი აპარატიც რუსეთს გაუშვია ერთი დღე-ღამის განმავლობაში“, — ნათქვამია ინფორმაციაში.
რუსეთის თავდაცვის სამინისტროს მონაცემებით, დღე-ღამის განმავლობაში საჰაერო თავდაცვის ძალებმა ჩამოაგდეს 992 უკრაინული თვითმფრინავის ტიპის უპილოტო საფრენი აპარატი, ოთხი შორი რადიუსის ფრთოსანი რაკეტა და ათი მართვადი ავიაბომბი. უწყება არ აკონკრეტებს იმ დრონების რაოდენობას, რომლებმაც მიზანს მიაღწიეს, რაც ჟურნალისტების შეფასებით, იძლევა ვარაუდის საფუძველს, რომ სინამდვილეში დრონების რაოდენობა უფრო მეტი იყო.
რუსეთის ყველაზე მასშტაბური დარტყმა უკრაინაზე მარტში განხორციელდა
რუსეთის ყველაზე დიდი დარტყმა უკრაინაზე სრულმასშტაბიანი ომის დაწყებიდან 24 მარტს განხორციელდა. მაშინ რუსეთის ჯარებმა ერთი დღე-ღამის განმავლობაში უკრაინის ტერიტორიების მიმართულებით 948 დრონი გაუშვეს.
უკრაინის წინა რეკორდული დარტყმა 6 ივნისს დაფიქსირდა. რუსეთის თავდაცვის სამინისტრო მაშინ იუწყებოდა, რომ საჰაერო თავდაცვის ძალებმა 911 დრონი, 13 ავიაბომბი და HIMARS-ის ოთხი ჭურვი ჩამოაგდეს.
„აგენტსტვო“ წერს, რომ ეს მონაცემები უკრაინის შეიარაღებული ძალების „მზარდ შესაძლებლობებზე“ მიუთითებს — ომის პირველ წლებში უკრაინა რუსეთის არმიას ტერიტორიის სიღრმეში დარტყმების ინტენსივობით ვერ უტოლდებოდა.