“შემზარავია პატრიარქის დუმილი! მის ადგილას შევიდოდი ელენე ხოშტარიას მოსანახულებლად”- ოპოზიციური პარტია „ლელო — ძლიერი საქართველოს” ერთ-ერთმა ლიდერმა, ალეკო ელისაშვილმა განცხადება გააკეთა საკუთარ სისხლის სამართლის საქმესთან დაკავშირებით, რომელშიც მას ტერორისტული აქტის ჩადენის მცდელობა ედება ბრალად.
- “ველოდები პატრიარქი რომ აიმაღლებს ხმას ამ უსამართლობის წინააღმდეგ! შემზარავია მისი დუმილი! მაგის ადგილას შევიდოდი ელენე ხოშტარიას მოვინახულებდი.[…]ელენე ხოშტარიასთან ყოველთვის ცუდი ურთიერთობა მქონდა, მაგრამ ჩემი მხარდაჭერა ელენე ხოშტარიას”- განაცხადა ელისაშვილმა.
ალეკო ელისაშვილის თქმით, საქმეში არსებული მტკიცებულებები არ იძლევა ადამიანის იდენტიფიცირების შესაძლებლობას — ექსპერტიზამ ვერ დაადგინა, ვინ იმყოფებოდა ადგილზე. ელისაშვილმა აღნიშნა, რომ პროკურატურის მიერ წარდგენილი მტკიცებულებათა ერთობლიობა მას დამაჯერებლად არ მიაჩნია.
პოლიტიკოსის განცხადებით, იგი 29 ნოემბერს დააკავეს და თავდაპირველად ქონების დაზიანების მუხლით წაუყენეს ბრალი. შემდგომში, მისი თქმით, საქმე ტერორისტული აქტის მუხლით გადაკვალიფიცირდა საქართველოს პარლამენტის თავმჯდომარის, შალვა პაპუაშვილის განცხადების შემდეგ. ელისაშვილმა გადაწყვეტილებას პოლიტიკურად მოტივირებულად მიიჩნევს.
მან ასევე ისაუბრა ადრე გახსნილ საქმეზე, რომელიც, მისი ვერსიით, წელზე მეტი ხნის განმავლობაში გამოუძიებელი იყო მტკიცებულებათა არასაკმარისობის გამო. ელისაშვილის თქმით, ამ საქმის ხელახლა ამოქმედება და ტერორიზმის მუხლზე გადაყვანა მის წინააღმდეგ მიმართულ კამპანიასთან არის დაკავშირებული.
მან ასევე გააკრიტიკა საპროცესო შეზღუდვები — კერძოდ, ოჯახის წევრებთან პაემნისა და ციხიდან დარეკვის აკრძალვა, რასაც, მისი თქმით, მოწმეებზე ზემოქმედების თავიდან აცილებით ხსნიან, მაშინ როცა ამ საქმეს მოწმე არ ჰყავს.
ელისაშვილმა საქმე პოლიტიკურ შურისძიებად შეაფასა და ბრალდება პარლამენტის თავმჯდომარის, „ქართული ოცნების” საპარლამენტო ფრაქციის ყოფილი თავმჯდომარის, მამუკა მდინარაძის სახელს დაუკავშირა.
მისი თქმით, საქმე “დაუჯერებელი და საოცარია”, რადგან საქმეში არსებობს მტკიცებულებები, რომლებზეც ექსპერტიზა ადამიანის ვინაობას ვერ ადგენს.
„უხერხული, დაუჯერებელი და საოცარი საქმეა. მეცინება, როდესაც პროკურორს ვუსმენ და მტკიცებულებათა ერთობლიობაზე მიუთითებს, ეს ყველაფერი კი ისე ჟღერს, რომ გეგონება ამ საქმეზე ადამიანს ტყუილად არ დაიჭერდნენ.
29 ნოემბერს დამიჭირეს, 2 დღე ბრალი ქონების დაზიანების მუხლით მქონდა წარდგენილი. ეს არ ეყოთ, რომ ჩემს წინააღდეგ უფრო კარგად გამოელაშქრათ. გამოვიდა პაპუაშვილი და ეს ტერორიზმიაო და ამის შემდეგ ბრალი გადამიკვალიფიცირეს – რადგან პაპუაშვილმა თქვა, ტერორისტი გავხდი, მაგრამ თვითონვე მიხვდნენ, რომ ბინ ლადენიც ტერორისტია და მეც, ვერ ჯდებოდა. ეს ბრალი თავიდან ბოლომდე პოლიტიკურია.
1 წელი გაუხსნელი საქმე ჰქონდათ თაროზე შემოდებული, იმიტომ იყო გაუხსნელი, რომ არანაირი მტკიცებულება არ იყო, სადაც ადამიანის ამოცნობა შეიძლება. ერთადერთი ჩანაწერია და გაუმარჯოს ღმერთმა იმ გოგოს თუ ბიჭს, რასაც აკეთებდა. ამ სასამართლოში სამართალი არ იპოვნება. დანაშაულია, მაგრამ ექსპერტიზა წერს, რომ აქ ადამიანის ამოცნობა შეუძლებელიაო, მაგრამ რადგან ჩემს წინააღმდეგ რაღაცების დალაგება მოუნდათ, დაალაგეს – ელისაშვილი დაჭერილი გვყავს, ტერორიზმის მუხლი წარვუდგინეთ და მეტი დამაჯერებლობისთვის, ეს საქმეც ტერორიზმის მუხლად გადააკვალიფიცირეს.
მაღაზიაში ტელევიზორი რომ ვიღაცამ მოიპაროს, ეს ქურდობა ხომ არის? მაგრამ ბინ ლადენმა რომ მოიპაროს, ეს ტერორიზმია? ლოგიკა არ არის. ეს სადღაც კაბინეტში ვიღაც ადამიანების მიერ არის გადაწყვეტილი. რომელი მტკიცებულებების ერთობლიობა? ექსპერტიზა ამბობს, რომ ადამიანის ამოცნობა შეუძლებელიაო.
საქმეში მოწმე არ არის, რომელმაც დანაშაული დაინახა, მოწმეები მეხანძრეები არიან, რომლებიც ყვებიან, რომ დომინოს თამაშობდა და “მითხრეს ხანძარიაო, მოვედი, დავასხი წყალი და ჩავაქრეო”. მოწმეებმა რა უნდა თქვან? პროკურატურა კი აკრძალვებს აკრძალვებზე მიწესებს, რომ არ დავრეკო ციხიდან, პაემანი რომ არ მქონდეს ოჯახის წევრებთან და რა მოტივით? – რომ “მოწმეებზე არ მოახდინოს გავლენაო?”. რომელ მოწმეზე – მეხანძრეზე, რომელმაც უნდა თქვას 10 ტონა წყალი დაასხა თუ 11 ტონა?
ეს იმიტომ ხდება, რომ მამუკა მდინარაძეს ვერ მოუნელებია “ბაირამ დუდუკში” რომ მოხვდა. იმ ციხეში გამიშვეს, სადაც არ მეკუთვნის, პოლიტიკოსების ციხეში უნდა ვიყო, მაგრამ რატომ? იმიტომ, რომ მდინარაძე ვერ ინელებს, რომ მოხვდა.
ეს ჩემს წინააღდეგ პოლიტიკური შურისძიებაა, ვიღაცას დაესიზმრა და ბრალი გაჩნდა. როგორ შეიძლება წვიმის დროს, ცეცხლს წყალს რომ ასხამენ, ძაღლმა ნიმუში აიღოს. ვერ მოუნელებია მდინარაძეს, რომ ბარაქიანი მუშტი მოხვდა”, – განაცხადა ალეკო ელისაშვილმა.
ამავე საქმეზე ელისაშვილის შემდეგი პროცესი, 10 ივლისს – 11:00 საათზე გაიმართება.
ცნობისთვის, ალეკო ელისაშვილს ბრალდება სისხლის სამართლის კოდექსის 19-323-ე მუხლის პირველი ნაწილით წარედგინა, რაც ტერორისტულ აქტს: აფეთქებას, ცეცხლის წაკიდებას, ადამიანზე თავდასხმას, იარაღის გამოყენებას ან სხვა ქმედებას გულისხმობს ჩადენილს ტერორისტული მიზნით, რომელიც ადამიანის სიცოცხლის მოსპობის, მნიშვნელოვანი ქონებრივი ზიანის, ან სხვა მძიმე შედეგის განხორციელების საშიშროებას ქმნის.აღნიშნული ქმედება 10-დან 15-წლამდე ვადით თავისუფლების აღკვეთას გულისხმობს.
ალეკო ელისაშვილის წინააღმდეგ მიმდინარე ორ საქმეზე სასამართლო პროცესები დღეს ერთმანეთის მიყოლებით იმართება.შემდეგი პროცესი, მეორე საქმეზე დღეს 13:00 საათზეა ჩანიშნული, თუმცა სხდომაში მონაწილეობას ვერ მიიღებს, რადგან მოსამართლემ ის პროცესიდან გააძევა.
