საფრანგეთის სამ ათეულზე მეტ დეპარტამენტში, მათ შორის პარიზში, ანომალიური სიცხის გამო ამინდის საფრთხის წითელი დონე გამოცხადდა. ამის შესახებ კვირას, 21 ივნისს, France 24 ქვეყნის მეტეოსამსახურზე დაყრდნობით იუწყება. ამის გამო ხელისუფლებამ რიგ ქუჩის ღონისძიებებზე ალკოჰოლის მოხმარება შეზღუდა. გაუქმების საფრთხის ქვეშაა ასევე დიდი ყოველწლიური მუსიკალური ფესტივალის — Fête de la Musique-ის ფარგლებში დაგეგმილი ღონისძიებებიც.
„პრეფექტები გამოსცემენ განკარგულებებს საზოგადოებრივ ადგილებში ალკოჰოლის მოხმარების აკრძალვის შესახებ იმ დეპარტამენტებში, რომლებიც წითელ ზონაშია“, — ნათქვამია მთავრობის განცხადებაში. საფრანგეთის მეტეოსამსახური ქვეყანაში 22 ივნისიდან პიკურ ტემპერატურას — 38-დან 41 გრადუსამდე ცელსიუსით — ელოდება.
ამჟამად ექსტრემალური სიცხის გამო ქვეყნის 60 დეპარტამენტში მოქმედებს საფრთხის მეორე, ნარინჯისფერი დონე, თუმცა ზოგიერთ მათგანში, 38 გრადუსის გადაჭარბების შემდეგ, შესაძლოა წითელი დონეც ამოქმედდეს, რაც შეზღუდვებს ითვალისწინებს. სიცხის ხანგრძლივობა ჯერჯერობით გაურკვეველია.
სკოლების და მატარებლების გაუქმება
ხელისუფლების განცხადებით, აკრძალვა იმისთვის შემოაქვთ, რომ ანომალიური სიცხის ფონზე „სასწრაფო დახმარებისა და სამედიცინო პერსონალის რესურსი ყველაზე მოწყვლად ადამიანებზე ზრუნვისთვის შენარჩუნდეს“. ქვეყნის დედაქალაქში პარიზელებისა და ტურისტებისთვის პარკები და ბაღები მთელი ღამის განმავლობაში ღია იქნება. კვირის დასაწყისიდან გაგრძელებულმა სიცხემ უკვე გამოიწვია ათობით მატარებლის გაუქმება და სკოლებში სწავლების შეჩერება. მეტეოსამსახურში ამ სიცხეს ივნისისთვის „უპრეცედენტო, ისტორიული და გამორჩეული“ უწოდეს.
გარდა ამისა, ანომალიური სიცხის ტალღამ იტალიაც მოიცვა. წითელი საფრთხის დონე გამოცხადებულია ბოლონიაში, ბრეშიაში, პერუჯაში, ფლორენციასა და ტურინში. ნარინჯისფერი დონე მოქმედებს ქვეყნის კიდევ შვიდ რეგიონში, მათ შორის მილანსა და რომში.
გერმანიაშიც, ქვეყნის ჩრდილოეთის გარდა, სხვადასხვა რეგიონში სიცხე კვირის დასაწყისიდან გრძელდება. სინოპტიკოსების ვარაუდით, პიკი პარასკევს, 26 ივნისს იქნება — ამ დღეს ჰამბურგში 35 გრადუსია მოსალოდნელი, ხოლო ქვეყნის დასავლეთსა და სამხრეთში — 38 გრადუსამდე. ამის შემდეგ მოსალოდნელია წვიმები და ტემპერატურის ეტაპობრივი კლება.