უკრაინის პრეზიდენტის ადმინისტრაციის ხელმძღვანელმა კირილო ბუდანოვმა პრეზიდენტ ვოლოდიმირ ზელენსკის ურჩია, უარი ეთქვა ისეთ კომპრომისზე, რომელიც რუსეთს დონბასზე კონტროლის აღიარების საშუალებას მისცემდა. ამის შესახებ The New York Times წერს ბუდანოვთან ჩატარებული ინტერვიუს საფუძველზე, რომელიც კიევში ბოლო შაბათ-კვირას ჩაიწერა.
ბუდანოვის შეფასებით, ტერიტორიის დათმობით მოსკოვი ისეთ ჯილდოს მიიღებდა, რომლის მოპოვებასაც ჯარი ბრძოლის ველზე ვერ ახერხებდა. გამოცემა იმასაც აღნიშნავს, რომ აბუ-დაბიში გამართულ მოლაპარაკებებზე დონბასის ომისშემდგომი მართვის სამი ალტერნატიული ვარიანტი განიხილებოდა — ტერიტორიის გადაცემა კერძო სამხედრო კომპანიებისთვის, დონალდ თრამპის ე.წ. „მშვიდობის საბჭოსთვის“, ან ერთობლივი უკრაინულ-რუსული სამოქალაქო ადმინისტრაციის ჩამოყალიბება.
ბუდანოვის თქმით, ტრამპის ადმინისტრაციის შუამავლობით მოლაპარაკებები სექტემბრის ბოლოს, რუსეთის საპარლამენტო არჩევნებისა და აშშ-ის შუალედური არჩევნების შორის პერიოდში განახლდება — შესაძლოა კიევში სტივ უიტკოფისა და ჯარედ კუშნერის ვიზიტით. მისივე შეფასებით, ცეცხლის შეწყვეტის რეალური პირობები გაზაფხულამდე ნაკლებად სავარაუდოა, რადგან რუსეთი უკრაინის გატეხვას ომის მეოთხე სტრატეგიული ზამთრის დაბომბვის კამპანიით შეეცდება. „მოლაპარაკებები ადრე თუ გვიან რაღაცამდე მიგვიყვანს. მთელი სიცოცხლის განმავლობაში ბრძოლა შეუძლებელია“, — თქვა მან.
გამოცემის ინფორმაციით, უკრაინის სამოლაპარაკებო გუნდი ორ ფრთადაა გაყოფილი: ბუდანოვის გარშემო თავმოყრილი ნაწილი ომის სწრაფ, ამერიკის ლიდერობით მიღწეულ დასრულებას უჭერს მხარს, ხოლო ყოფილი ხელმძღვანელის, ანდრი იერმაკის გავლენის ქვეშ მყოფი მეორე ნაწილი დათმობებზე უფრო თავშეკავებულია. ზელენსკი, გამოცემის თანახმად, ამ ორ პოზიციას შორის აბალანსებს.