ბოსტონის ფედერალურმა ნაფიც მსაჯულთა კოლეგიამ საქართველოს 33 წლის მოქალაქეს, ერეკლე გუგავას, ფულის გათეთრების შეთქმულებაში მონაწილეობისთვის ბრალი წაუყენა. საქმეს აშშ-ის იუსტიციის დეპარტამენტი და მასაჩუსეტსის ფედერალური პროკურატურა აწარმოებენ, ბოსტონის ფედერალური პროკურატურის ინფორმაციით გუგავა უცხოეთში დაფუძნებული კრიმინალური დაჯგუფებისთვის ფულის გამთეთრებლის ფუნქციას ასრულებდა.
გამოძიების მონაცემებით, სქემა 1.3 მილიარდ დოლარს მოიცავს და ჯანდაცვის სექტორს ეხება — უწყების შეფასებით, ეს ერთ-ერთი უმსხვილესი ამგვარი შემთხვევაა, რაც კი გამოუძიებიათ. გუგავა, ინფორმაციით, აშშ-ში არალეგალურად ცხოვრობდა, როცა მასშტაბურ თაღლითურ სქემაში მონაწილეობდა, და მიჩნეულია, რომ რუსეთსა და სხვა ქვეყნებში ბაზირებული საერთაშორისო კრიმინალური დაჯგუფებისთვის მუშაობდა.
ბრალდების დოკუმენტების თანახმად, გუგავა 2025 წლის თებერვლიდან ივლისამდე ფლობდა პენსილვანიაში მდებარე სამედიცინო აღჭურვილობის კომპანიას. ამ კომპანიის — ND Medical Solutions, LLC-ის — მეშვეობით, გამოძიების ვერსიით, სახელმწიფო სადაზღვევო პროგრამისა (Medicare) და კერძო სადაზღვევო კომპანიების მიმართ თაღლითური ანაზღაურების მოთხოვნები წარდგინდა 1.3 მილიარდი დოლარის ოდენობით. სადაზღვევო კომპანიებმა კომპანიას რეალურად დაახლოებით 6.5 მილიონი დოლარი ჩაურიცხეს.
გუგავამ, გამოძიების ცნობით გახსნა რამდენიმე საბანკო ანგარიში, სადაც ერთადერთი ხელმომწერი თავად იყო, რომელთა მეშვეობითაც სადაზღვევო კომპანიებისა და Medicare-ის მიერ გადარიცხული თანხების უცხოურ ანგარიშებზე გადატანას უზრუნველყოფდა — ორგანიზაციის სასარგებლოდ. აშშ-ის იუსტიციის დეპარტამენტის წარმომადგენლის, კოლინ მაკდონალდის განცხადებით, გუგავა აქტიურად ეხმარებოდა კრიმინალურ ქსელს მოპარული ფინანსების შიდა და საერთაშორისო არხებით გადაადგილებაში.  
გუგავამ სავარაუდო დანაშაულებრივი საქმიანობის შემდეგ, 2025 წლის ივლისში, აშშ დატოვა და, ცნობით, ამჟამად მიმალვაშია. ბრალდება ითვალისწინებს 20 წლამდე თავისუფლების აღკვეთას, სამ წლამდე ზედამხედველობის ქვეშ გათავისუფლებას და $500,000-მდე ჯარიმას.  
აშშ-ის ხელისუფლება ხაზგასმით აღნიშნავს, რომ ეს ჯერჯერობით მხოლოდ ბრალდებაა — გუგავა უდანაშაულოდ ითვლება მანამ, სანამ მისი ბრალეულობა სასამართლოში გონივრულ ეჭვს მიღმა არ დამტკიცდება.