აშშ-ის შეიარაღებული ძალების ცენტრალურმა სარდლობამ (CENTCOM) სამშაბათს, 8 სექტემბერს, ხუთი ირანული ნავთობტანკერი გაანადგურა მას შემდეგ, რაც ირანის ისლამური რევოლუციის გუშაგთა კორპუსმა (IRGC) ბოლო ორი დღის განმავლობაში აშშ-ის სამხედრო-საზღვაო ძალების ხომალდს ბალისტიკური რაკეტებით ორჯერ შეუტია. ამის შესახებ CENTCOM-ის პრესსამსახურმა სოციალურ ქსელ X-ში განაცხადა.
სარდლობის ცნობით, ამერიკულმა ხომალდმა ირანულ თავდასხმებს წარმატებით აარიდა თავი და რეგიონულ წყლებში პატრულირება განაგრძო. სამხედრო პერსონალიდან არავინ დაშავებულა.
CENTCOM: ირანი ტანკერებს მრავალმილიარდიანი „ჩრდილოვანი“ ქსელის ფარგლებში იყენებდა
CENTCOM-მა ომანის ყურეში გაანადგურა IRGC-სთან დაკავშირებული ნავთობტანკერები M/T Kaviz, M/T Charminar, M/T Horizon 1 და M/T Riesco, ხოლო სპარსეთის ყურეში, კუნძულ ხარკის მახლობლად — ტანკერი M/T Derya.
CENTCOM-ის განცხადებით, ამერიკულმა ძალებმა ეკიპაჟებს ხომალდების დატოვება უბრძანეს მანამდე, სანამ ტანკერებს დაარტყამდნენ და მწყობრიდან გამოიყვანდა.
სარდლობის ინფორმაციით, ირანი ამ ტანკერებს მრავალმილიარდიანი „ჩრდილოვანი“ ქსელის ფარგლებში იყენებდა, რომელიც IRGC-სა და მის რეგიონულ მოკავშირე ძალებს აფინანსებდა. აშშ-ის სამხედროების განცხადებით, თეირანს ამ ხომალდების დასაცავად საჭირო საშუალებები არ გააჩნია.
მანამდე, 5 სექტემბერს, CENTCOM-ის ძალებმა სამი ირანული ნავთობტანკერი გაანადგურეს მას შემდეგ, რაც IRGC-მ ამერიკულ ავიამზიდსა და სარაკეტო ესკადრულ ნაღმოსანს შეუტია.
დარეგულირების მიმართულებით პროგრესი არ არის
აშშ-ის შეიარაღებულ ძალებს ირანისთვის ივლისის ბოლოდან არ დაურტყამთ. თეთრი სახლის ხელმძღვანელმა დონალდ ტრამპმა შესაბამისი გადაწყვეტილება ახსნა თეირანთან მოლაპარაკებების გაგრძელების სურვილით — მათ შორის ჰორმუზის სრუტის სტატუსის, სანქციებისა და ირანის ბირთვული პროგრამის საკითხებზე.
ერთთვიანი პაუზის შემდეგ აშშ-მა პირველი დარტყმა 30 აგვისტოს განახორციელა და ჰორმუზის სრუტეში მდებარე კუნძულ ლარეკზე ირანის ორ სარაკეტო დანადგარს შეუტია.
თეირანში განაცხადეს, რომ საპასუხოდ არაბთა გაერთიანებულ საამიროებში ამერიკულ სამიზნეებს შეუტიეს. ათობით უპილოტო საფრენი აპარატი თავს დაესხა „ამერიკულ ვერტმფრენებსა და პერსონალს ალ-მინჰადის ბაზაზე“ არაბთა გაერთიანებულ საამიროებში.
ჰორმუზის სრუტე, რომელსაც მსოფლიო ნავთობმომარაგებისთვის უმნიშვნელოვანესი როლი აქვს, აშშ-ისა და ისრაელის ირანის წინააღმდეგ ომის ერთ-ერთი მთავარი სადავო საკითხია. თებერვლის ბოლოს საბრძოლო მოქმედებების დაწყებამდე სრუტე ნაოსნობისთვის ღია იყო. დღეს მასზე კონტროლის შესახებ როგორც ირანის, ისე აშშ-ის შეიარაღებული ძალები აცხადებენ.