აშშ-ის ადმინისტრაციის მოსკოვთან მოლაპარაკებები უკრაინაში ომის შეწყვეტის შესახებ გაფართოვდა და მოიცავს მრავალმილიარდიან ნავთობის გარიგებასაც, რომელიც სარგებელს მოუტანს ახლო აღმოსავლეთის ბიზნესმენებს, რომლებიც დაკავშირებული არიან აშშ-ის მთავარ მომლაპარაკებლებთან — სტივ უიტკოფთან და ჯარედ კუშნერთან. ამის შესახებ შაბათს, 3 ოქტომბერს, გაზეთი The New York Times (NYT) წერს.
გამოცემის ინფორმაციით, გარიგება ეხება რუსული კომპანია „ლუკოილის“ კუთვნილ ნავთობის საბადოებს, ნავთობგადამამუშავებელ ქარხნებსა და ავტოგასამართ სადგურებს მსოფლიოს სხვადასხვა ქვეყანაში.
ამ მასშტაბური გარიგების განსახორციელებლად, რომელიც მოიცავს მრავალფეროვან აქტივებს — კამერუნის ნავთობის საბადოებიდან და ევროპაში მდებარე ნავთობგადამამუშავებელი ქარხნებიდან დაწყებული, ნიუ-ჯერსიში არსებულ ავტოგასამართი სადგურების ქსელით დამთავრებული — საჭიროა როგორც აშშ-ის მთავრობის, ისე კრემლის თანხმობა.
გარიგება ხელსაყრელია კუშნერის პარტნიორებისა და უიტკოფის ოჯახისათვის
როგორც გაზეთი აღნიშნავს, შესაბამისი შეთანხმების ხელშემწყობ ჯგუფში შედიან ამერიკელი ინვესტორი და მილიარდერი ტოდ ბოელი, რომელმაც აშშ-ის პრეზიდენტ დონალდ ტრამპის პოლიტიკურ პროექტებს 2 მილიონი დოლარი შესწირა; ახლო აღმოსავლეთის ორი სტრუქტურა, რომლებიც თანამშრომლობდნენ კუშნერთან ან უიტკოფის ოჯახთან; ასევე აშშ-ის მთავრობის ერთ-ერთი უწყება.
ამასთან, The New York Times აღნიშნავს, რომ არ არსებობს არანაირი ნიშანი იმისა, რომ თავად კუშნერი ან უიტკოფი ამ გარიგებიდან სარგებელს მიიღებენ.
გამოცემის ცნობით, რუსეთის პრეზიდენტმა ვლადიმირ პუტინმა ამ გარიგების საკითხი წამოჭრა უიტკოფთან და კუშნერთან შეხვედრისას, რომელიც 5 სექტემბერს კრემლში გაიმართა. ერთ-ერთი ინფორმირებული წყაროს თქმით, პუტინმა გარიგების დადება შესთავაზა იმის საჩვენებლად, რომ რუსებს აშშ-სთან ბიზნესის წარმოების შესაძლებლობა აქვთ.
NYT წერს, რომ საბოლოო ჯამში ნავთობის შეთანხმების გაფორმება პუტინისა და ტრამპის გადაწყვეტილებებზეა დამოკიდებული.
თეთრ სახლს, აშშ-ის ფინანსთა სამინისტროსა და კომპანია „ლუკოილს“ NYT-ის ჟურნალისტების მოთხოვნაზე კომენტარის გაკეთების შესახებ პასუხი არ გაუციათ.