სოფელ ატოცში საოკუპაციო ხაზთან ამჟამად სიმშვიდეა. ოკუპანტებმა უკანონო ბორდერიზაციის პროცესი დროებით შეაჩერეს. ინფორმაციას ამის შესახებ ანტისაოკუპაციო მოძრაობა “ძალა ერთობაშიას” წევრი დავით ქაცარავა ავრცელებს. მისი ინფორმაციით, ატოცში ოკუპანტებმა გადაადგილება გუშინ დაიწყეს, თუმცა უამინდობის გამო, ტერიტორია მალევე დატოვეს. ქაცარავა ამბობს, რომ საოკუპაციო ხაზთან იმყოფება ევროკავშირის სადამკვირვებლო მისიაც, რომელიც “ძალა ერთობაშიას” აქტივისტების მოთხოვნის საფუძველზე ატოცში გუშინვე ჩავიდა. ადგილზე იმყოფებიან სამართალდამცავებიც.
ამ სოფელში პირველი ღობეები რუსმა ჯარისკაცებმა 2014 წლის თებერვალში გაავლეს. მაშინდელი საოკუპაციო გამყოფი ხაზის სიგრძე 2 კილომეტრი იყო. მაშინ სოფელმა 30 ჰექტარი სახნავ-სათესი მიწის ფართი დაკარგა. მცოცავი ოკუპაცია ატოციდან ოსურ სოფელ ბალთის მიმართულებით კვლავ გაგრძელდა.
ატოცი არის სოფელი აღმოსავლეთ საქართველოში, შიდა ქართლის მხარის ქარელის მუნიციპალიტეტში, ბრეძის თემში. მდებარეობს მდინარე დასავლეთის ფრონეს მარცხენა ნაპირზე, ზღვის დონიდან 900 მ სიმაღლეზე. ქარელიდან დაშორებულია 27 კილომეტრით.