მამუკა მდინარაძე ამბობს, რომ „ეცდებიან, მთელ ქვეყანაში დააყენონ სახის ამომცნობი კამერები დანაშაულის პრევენციის მიზნით“.
„თქვენგან პირველად მესმის. რამდენად ახლოს არის რეალობასთან, ამას ძალიან ახლო მომავალი გვაჩვენებს. ღრმა სიბერეს გისურვებთ და ჯანმრთელობას, ძალიან დიდი ხნის სიცოცხლეს და გისურვებთ, რომ სიბერეში ეფესბე გითვალთვალებთ და რაღაცებს აკეთებს, ეს შიშები არ დაგეუფლოთ.ღრმა სიბერეში გისურვებთ, არ დაგესიზმროთ ყოველ ღამე ეფესბე, რომ გითვალთვალებთ ვიღაცა, სახეზე გცნობთ ამომცნობი კამერებით, ეს სიგიჟეები არ დაგესიზმროთ. შემდეგ ბრიფინგზე რაც მეცოდინება, ყველაფერს გეტყვი.სახის ამომცნობ კამერებს დანაშაულის პრევენციის მიზნით რუსთაველზე კი არა, მთელ ქვეყანაში ვეცდებით, რომ დავაყენოთ წლების განმავლობაში“, – თქვა მამუკა მდინარაძემ.
მას ასევე “დიდი სისულელე ჰგონია”, თითქოს სახის ამომცნობ კამერებს შინაგან საქმეთა სამინისტრო მოსკოვში ყიდულობს.
„რაც ამ თანამდებობაზე ვარ, ყველა შესყიდვას ხელს ვაწერ. ჩემი თანხმობის გარეშე არცერთი შესყიდვა არ გასულა. არათუ მოსკოვი და რუსეთის რომელიმე ქალაქი, რუსეთთან დაკავშირებული რომელიმე ადგილიდან არანაირი შესყიდვა ჩემთან არ შემოსულა ხელმოსაწერად და სულხან თამაზაშვილი ჩუმად არ იყიდის მოსკოვიდან რაღაც კამერებს, გამორიცხული ამბავია. ნუ გელანდებათ და გეჩვენებათ ყველგან რუსეთი“, – მიმართა მან ჟურნალისტს.
27 ივნისს algorithmwatch-მა გამოაქვეყნა გამოძიება, რომლის თანახმადაც, საქართველოს შინაგან საქმეთა სამინისტრო 2013 წლიდან სახის ამომცნობ სპეციალურ სისტემას – Polyface მოსკოვში დაფუძნებული კომპანია Papillon AO-სგან ყიდულობს, რომელიც კავშირშია უსაფრთხოების ფედერალურ სამსახურთან (FSB).
კომპანია სანქცირებულია შვეიცარიის, უკრაინის, იაპონიისა და ამერიკის შეერთებული შტატების მიერ. კომპანიის პროდუქტების ძირითადი ნაწილს კი რუსეთის სამართალდამცავი ორგანოები და რუსეთის მოკავშირე სახელმწიფოები იყენებენ.