„ნაციონალურმა მოძრაობამ“ დაიწყო ომი, რომელიც დასრულდა ჩვენი ქვეყნისთვის უბედურებით, – ამის შესახებ ირაკლი კობახიძემ შინდისის გმირების მემორიალთან განაცხადა.
კობახიძის წინა განცხადება, – რომ 2008 წლის ომი სააკაშვილმა დაიწყო, ცხინვალის საოკუპაციო რეჟიმმა საქართველოს დასადანაშაულებლად გამოიყენა და თქვა, რომ ოფიციალური თბილისის ეს პოზიცია ნიშნავს, რომ აგრესორი საქართველოა, როგორც ქვეყანა, რადგან სააკაშვილი მაშინ სწორედ ქართულ სახელმწიფოს წარმოადგენდა.
მარიონეტული რეჟიმის ამ გამოხმაურებაზე დღეს კობახიძემ არ ისაუბრა, – თქვა, რომ „არავითარი „სამხრეთ ოსეთის“ და აფხაზეთის რესპუბლიკა არ არსებობს და გამომდინარე აქედან, საერთოდ არ გვაინტერესებს, რა განცხადებებს აკეთებენ ოკუპირებული ტერიტორიების დე ფაქტო წარმომადგენლები“.
თუმცა, გაიმეორა იგივე და „ნაციონალური მოძრაობა“, „გარედან დაკვეთილი ავანტიურის“ შესრულებაში დაადანაშაულა:
„ქართულ მხარეს არავინ ადანაშაულებს. ჩვენ ვადანაშაულებთ თქვენს პარტიას, მხოლოდ და მხოლოდ თქვენს პარტიას იმ ავანტიურაში, რაც ჩაიდინეს გარე დაკვეთით. საქართველოს და ქართულ მხარეს არავინ ადანაშაულებს. თქვენმა პარტიამ როდესაც მოკლა სანდრო გირგვლიანი, ბუტა რობაქიძე, მაშინ საქართველოს არ მოუკლავს არც გირგვლიანი და არც რობაქიძე, თქვენმა პარტიამ მოკლა, თქვენმა რეჟიმმა. თქვენმა პარტიამ დაიწყო ის ომი, რომელიც დასრულდა ჩვენი ქვეყნისთვის უბედურებით“ – უთხრა კობახიძემ ჟურნალისტებს.
მას ჟურნალისტმა ასევე ჰკითხა – არის თუ არა რუსეთი მტერი? – თუმცა პასუხად მიიღო ის, რომ სამარცხვინო შეკითხვას სვამს.
„თქვენი სამარცხვინო შეკითხვები, სასაცილოები ხართ. რატომ არის სამარცხვინო შეკითხვა გეტყვით, თქვენ, ძალიან მარტივად, გინდათ მიიღოთ „ჰედლაინი”, თუნდაც იგივე რუსულ მედიაში, იმასთან დაკავშირებით, რომ მე ვაცხადებ, რუსეთის ფედერაცია არის მტერი, ეს არის კონკრეტული პოლიტიკური განაცხადი, რომელსაც შემდეგ კონკრეტული ნაბიჯები უნდა მოაყოლო, დაახლოებით ან ზუსტად ის ნაბიჯები, რაც თქვენმა პარტიამ მოაყოლა 2008 წელს და იქამდე… კარგად უნდა გესმოდეთ ეს ყველაფერი და თუ გაიგებთ, ასეთ სამარცხვინო შეკითხვებს აღარ დასვამთ. აგიხსენით და ვერ გაიგეთ. ვიცი, რომ ვერ იგებთ, გულწრფელი ხართ ამაში. გაგების პრობლემა გაქვთ. გაგების პრობლემა ზოგადად რომ არ გქონდეთ, არ იქნებოდით არც „ნაცმოძრაობის“ პარტიული ტელევიზიების ჟურნალისტები. თქვენ „ფორმულაც“ და „ტვ პირველიც“ წარმოადგენთ კოლექტიურ „ნაცმოძრაობას“. ეს არის უცხოური აგენტურის პარტიული მედიადანამატი, შესაბამისად, თქვენ წარმოადგენთ კოლექტიურ „ნაცმოძრაობას“, უცხოური აგენტურის კონკრეტული განშტოება ხართ. თქვენ არ გეუბნებით პირადად, რომ თქვენ ხართ უცხოელი აგენტი, მაგრამ თქვენი ტელევიზია არის უცხოური აგენტურის ერთ-ერთი განშტოება. შესაბამისად, თქვენი პოზიცია არის სათაკილო, როდესაც თქვენ კვლავ ემსახურებით იმ პოლიტიკურ პარტიას, რომელმაც ჩაიდინა დანაშაული 2008 წელს და გააკეთა ყველაფერი იმისათვის, რომ მომხდარიყო ის, რაც მოხდა, როცა ამ პარტიას ემსახურებით დღესაც, ეს არის უაღრესად სათაკილო მოვლენა“ – განაცხადა ირაკლი კობახიძემ.
წინა ხელისუფლებას „მოღალატე“ და „უგუნური“ უწოდა დღეს „ოცნების“ თავდაცვის მინისტრმა. კითხვას, – დაიწყო თუ არა წინა ხელისუფლებამ და შესაბამისად, საქართველომ აგვისტოს ომი? – ირაკლი ჩიქოვანმა ასე უპასუხა:
„საქართველოს 2008 წელს ჰყავდა უგუნური და მოღალატე ხელისუფლება. ზუსტად ამიტომ მოხდა ის, რაც მოხდა. რაც შეეხება ამ ბიჭებს, ჩვენს ჯარისკაცებს, ეს ჯარისკაცები ყოველთვის მზად იყვნენ, არიან და იქნებიან დაიცვან საკუთარი ამოცანები და ყოველ ჯერზე, საკუთარ მოვალეობას შეასრულებენ. სამწუხაროდ, საქართველოს ჰყავდა მოღალატე ხელისუფლება და საქართველოს ჰყავდა მოღალატე ადამიანები, რომლებსაც წარმოდგენა არ ჰქონდათ და უგუნურები იყვნენ იმასთან დაკავშირებით, რას აკეთებდნენ.
ჩვენმა ხელისუფლებამ გააკეთა ყველაფერი იმისთვის, რომ ყველა სასამართლოში დაემტკიცებინა ჩვენი ჯარისკაცების სიმართლე, დაემტკიცებინა ჩვენი სახელმწიფოს სიმართლე“.
შინდისის გმირების მემორიალთან იმყოფებოდა მიხეილ ყაველაშვილიც. ის უმტკიცებდა ჟურნალისტებს, რომ რუსეთზე საუბარი შეუძლია:
„ახლა ხომ გაიგეთ რა ვთქვი (რუსეთზე), ხომ ამბობდით, რომ ვერ ვახსენებ. ხომ ვისაუბრე რუსეთსა და არსებულ ვითარებაზე“ – თქვა ყაველაშვილმა, რომელმაც 2008 წლის ომში რუსეთიც და საქართველოს მაშინდელი ხელისუფლებაც დამნაშავედ გამოაცხადა.
„ჩვენ ეს სახელმწიფო – რუსეთი ვამხილეთ, რომ ის არის განმხორციელებელი ოკუპაციის, მან ჩაიდინა დანაშაული ჩვენს წინაშე. ყველასთვის ცნობილია, რომ რუსეთის ფედერაციის მიერ არის ოკუპირებული ჩვენი 2 ტერიტორია, სამხედრო დანაშაული ჩაიდინეს. მორალური და სამართლებრივი საქართველო ამ სახელმწიფოსთან მართალია. რაზე აქვთ ამათ (ოპოზიციას) აქცენტი? იცით, როგორ უნდა დააყენონ საკითხი? ჩვენ თითქოს რუსეთის და რუსი ხალხის ინტერესებზე ვსაუბრობთ. არა! ჩვენ ჩვენი პასუხისმგებლობა გვაქვს. აგვისტოს დღეებში, ამ ბიჭებმა, გმირობა ჩაიდინეს, ჩვენ მაშინ ხელისუფლება გვყავდა, რომელსაც პასუხისმგებლობა გააჩნია სახელმწიფოს და ხალხის წინაშე. ამ პასუხისმგებლობიდან გამომდინარე, მათ ჩაიდინეს უგუნური ქმედება, დანაშაული ჩაიდინეს საკუთარი ხალხის წინაშე. ეს საკითხები რომ არ გაჟღერდეს და ხალხმა რომ არ გაიგოს სიმართლე, ამიტომ შემოაქვთ ეს თემა, “აი, რუსეთმა დაიწყო ომი, თუ საქართველომ”. ეს არის უბედურება! არ უნდათ ქართველმა ხალხმა იცოდეს სრული სიმართლე, თუ რა ჩაიდინა მაშინდელმა ხელისუფლებამ.. (საუბრობენ), რომ „საქართველოს აყენებენ შეურაცხყოფას“, “საქართველოს აბრალებენ ომის დაწყებას” და ასე შემდეგ, რათა არ გავიგოთ დეტალები.
ახლა ხომ გაიგეთ რა ვთქვი (რუსეთზე), ხომ ამბობდით, რომ ვერ ვახსენებ. ხომ ვისაუბრე რუსეთსა და არსებულ ვითარებაზე…“, – განაცხადა მიხეილ ყაველაშვილმა.
შინდისის ბრძოლა, 2008 წლის რუსეთ-საქართველოს ომის ერთ-ერთი ყველაზე გამორჩეული ეპიზოდია. 11 აგვისტოს, სოფელ შინდისის სარკინიგზო სადგურთან, საქართველოს შეიარაღებული ძალების მეორე ქვეითი ბრიგადის საინჟინრო ოცეული, უთანასწორო ბრძოლაში ჩაება რუსულ მოტომსროლელ ასეულთან, რომელიც სადგურის ახლოს იყო ჩასაფრებული. ბრძოლამ, დაახლოებით, ერთ საათამდე გასტანა, რომლის დროსაც, მოწინააღმდეგემ, დახმარება ორჯერ გამოიძახა. მტერი, ქართველი ჯარისკაცების მიმართულებით, თითქმის, ყველა სახის იარაღიდან ისროდა, მათ შორის, ტანკებიდან და რეაქტიული ცეცხლმტყორცნებიდან. 17-მა ქართველმა მებრძოლმა მებრძოლმა უთანასწორო ბრძოლაში სისხლის უკანასკნელ წვეთამდე იბრძოლა და გმირულად დაიღუპა.
