~უკრაინულმა ძალებმა ოკუპირებულ ყირიმში, საკის სამხედრო აეროდრომზე, რუსული Su-24M ტიპის ტაქტიკური ბომბდამშენი და აეროდრომზე განთავსებული ოთხი ერთეული ტექნიკა გაანადგურეს.ინფორმაციას, უკრაინის პრეზიდენტი, ვოლოდიმირ ზელენსკი ადასტურებს.
უკრაინის იერიშის ერთ-ერთი სამიზნე რუსეთის სამარის ოლქში, ნოვოკუიბიშევსკის ნავთობგადამამუშავებელი ქარხანაც იყო. ქარხანა ფრონტის ხაზიდან დაახლოებით 1 000 კილომეტრში მდებარეობს. უკრაინის პრეზიდენტის თქმით, საწარმოსგან მიღებული შემოსავლები რუსეთის მიერ ომის დასაფინანსებლად გამოიყენება. ქარხანაზე თავდასხმა 21-22 აგვისტოს ღამით განხორციელდა, რის შედეგადაც ობიექტზე ხანძარი გაჩნდა. ამავე ღამეს უკრაინულმა ძალებმა დრონებით იერიში მიიტანეს რუსეთის სამარის ოლქში მდებარე Ozon-ის ლოგისტიკურ ცენტრზეც. დარტყმის შედეგად ობიექტზე ხანძარი გაჩნდა და მისი მუშაობა შეჩერდა. რუსეთის ერთ-ერთმა უმსხვილესმა ონლაინ-რიტეილერმა Ozon-მა განაცხადა, რომ ინციდენტის შედეგად თანამშრომლები დაშავდნენ და 500-ზე მეტი ადამიანის ევაკუაცია გახდა საჭირო.
უკრაინის გენშტაბის ინფორმაციით, ნოვოკუიბიშევსკის ნავთობგადამამუშავებელი ქარხნის საწარმოო სიმძლავრე წელიწადში დაახლოებით 8,8 მილიონი ტონა ნავთობის გადამუშავებას შეადგენს. ქარხანა, სხვა პროდუქტებთან ერთად, საავტომობილო და საავიაციო საწვავსა და დიზელს აწარმოებს.
უკრაინის მიერ რუსეთის ტერიტორიაზე განხორციელებული დარტყმები ბოლო პერიოდში ძირითადად სამხედრო, საწვავისა და ლოგისტიკურ ინფრასტრუქტურაზეა მიმართული, რასაც კიევი რუსეთის საომარი შესაძლებლობების შესუსტების მცდელობად განიხილავს.