ტრამვაის ხაზის პროექტირება-მშენებლობის ხელშეკრულება თურქულ კომპანიასთან ოფიციალურად გაფორმდა. ხელშეკრულებას ხელი მოაწერეს თბილისის სატრანსპორტო კომპანიის გენერალურმა დირექტორმა გიორგი შარკოვმა და ერთობლივი საწარმო EYE-ის (Emre Ray, Yüksel და Erk) წარმომადგენელმა ჰალიტ ემრე ილმაზმა
„დღეს მართლაც გამორჩეული დღეა. მახსოვს, ტრამვაის მშენებლობის შესახებ პირველი განცხადება რომ გავაკეთე, რამხელა გამოხმაურება მოჰყვა მას საზოგადოებაში. იყო დიდი სიხარული, მაგრამ იყო სრულიად ბუნებრივი კითხვაც: „როდის იქცევა ეს იდეა რეალობად?“ დღეს, სწორედ ამ კითხვას ვცემთ პასუხს და იდეიდან კონკრეტულ საქმეზე გადავდივართ. ეს ჩემთვის და ჩემი თანაგუნდელებისთვის განსაკუთრებულად მნიშვნელოვანია, რადგან დიდი ინფრასტრუქტურული პროექტები ერთი განცხადებით არ კეთდება. მას სჭირდება დაგეგმვა, ფინანსური რესურსი, პროფესიონალების ჩართულობა და რაც მთავარია, პოლიტიკური ნება, რომ დაწყებული საქმე ბოლომდე მივიდეს“.
პროექტის დეტალები:
• სამი ეტაპი: კონცეპტუალური პროექტი, დეტალური პროექტი და სამშენებლო სამუშაოები
• სამივე ეტაპის ვადაა 36 თვე, ხოლო მთლიანი პროექტის დასრულება მომდევნო ოთხი წლის განმავლობაშია დაგეგმილი
• ბიუჯეტი — 287 654 321 ლარი
• მარშრუტი: დიდი დიღმის მე-3 და მე-4 მიკრორაიონების შემაერთებელი ტერიტორიიდან, დავით აღმაშენებლის ხეივნისა და დიღმის მასივის გავლით, მეტროსადგურ „დიდუბემდე“
• სიგრძე — დაახლოებით 7.5 კმ, 11 გაჩერებით
• მიზანია დიდი დიღმის მეტროსთან და შესაბამისად ცენტრთან სწრაფი დაკავშირება
ხელმოწერის ცერემონიას ესწრებოდნენ მერი კახა კალაძე, საკრებულოს თავმჯდომარე ზურაბ აბაშიძე, ვიცე-მერი გიორგი ტყემალაძე და თურქეთის ელჩი საქართველოში მუსტაფა თურქერ არი, სხვა მოწვეულ სტუმრებთან ერთად.
ტენდერი 31 მარტს გამოცხადდა. მონაწილეობა 4-მა კომპანიამ მიიღო, მათგან 3 თურქეთში იყო რეგისტრირებული და ერთი ჩინეთში.