უკრაინის გენერალურმა პროკურორმა რუსლან კრავჩენკომ განაცხადა, რომ თანამდებობიდან გადადგომის შესახებ განცხადება დაწერა.
ეს გადაწყვეტილება მან კორუფციული სკანდალის ფონზე მიიღო, რომლის ფარგლებშიც მის ერთ-ერთ დაქვემდებარებულს — გენერალური პროკურორის ოფისის საერთაშორისო თანამშრომლობის დეპარტამენტის ხელმძღვანელ სერგეი კრაპივას — კორუფციული ბრალდებები წაუყენეს.
შაბათ-კვირას უკრაინის ეროვნულმა ანტიკორუფციულმა ბიურომ (НАБУ) და სპეციალიზებულმა ანტიკორუფციულმა პროკურატურამ (САП) განაცხადეს, რომ გამოავლინეს დანაშაულებრივი ორგანიზაცია, რომელსაც, გამოძიების ვერსიით, გენერალური პროკურორის ოფისის ერთ-ერთი ხელმძღვანელი მართავდა. სქემის მონაწილეები, სავარაუდოდ, თაღლითური ქოლ-ცენტრებისგან ქრთამს იღებდნენ და უკანონოდ მოპოვებულ თანხებს ათეთრებდნენ.
დამოუკიდებელმა ანტიკორუფციულმა უწყებებმა გამოძიებას ოპერაცია „კართაგენი“ უწოდეს.
НАБУ-ს მიერ გამოქვეყნებულ ჩანაწერებში ფიგურირებს პირი მეტსახელად „შეფი“, რომელიც, უკრაინელი ჟურნალისტების ვარაუდით, შესაძლოა თავად კრავჩენკო იყოს.
თუმცა გენერალურმა პროკურორმა არაერთხელ განაცხადა, რომ ქოლ-ცენტრების მფარველობასთან არანაირი კავშირი არ აქვს და არც რაიმე დანაშაული ჩაუდენია.
„ეს პოლიტიკური გადაწყვეტილებაა და მე ის შეგნებულად მივიღე. არ მინდა, გენერალური პროკურორის თანამდებობა პოლიტიკური დაპირისპირების ინსტრუმენტად გამოიყენონ. ბრალდებებთან დაკავშირებით ჩემი პოზიცია უცვლელია“, — დაწერა კრავჩენკომ ორშაბათ საღამოს თავის Telegram-არხზე.
ჩხრეკები და დაკავებები
НАБУ-ს ოპერაციის ფარგლებში ჩხრეკები ჩატარდა, მათ შორის კრავჩენკოს სამუშაო კაბინეტსა და სახლში.
სასამართლომ საქმის ორი მთავარი ფიგურანტი — სერგეი კრაპივა და მისი მეგობარი ქალი ელიზავეტა ივახნენკო — უკვე დააპატიმრა.
სასამართლო სხდომის დროს ცნობილი გახდა საერთაშორისო თანამშრომლობის დეპარტამენტის ხელმძღვანელსა და გენერალურ პროკურორს შორის ახლო ურთიერთობის შესახებ. გამოძიების მასალების მიხედვით, კრაპივა კრავჩენკოს სახლში სარემონტო სამუშაოებსაც უტარებდა.
საქმის ყველა ფიგურანტი ბრალს უარყოფს. თავად კრავჩენკო კი მანამდე აცხადებდა, რომ გადადგომას არ აპირებდა.
„უკრაინსკა პრავდა“ წერს, რომ პრეზიდენტი ვოლოდიმირ ზელენსკი 7 სექტემბერს კრავჩენკოს შეხვდა და მასთან მისი გადადგომის საკითხი განიხილა.
კონსტიტუციის თანახმად, გენერალური პროკურორის პრეზიდენტის მიერ გათავისუფლებას უმაღლესი რადის თანხმობა სჭირდება. პარლამენტს ასევე შეუძლია მას საკუთარი ინიციატივით გამოუცხადოს უნდობლობა.
გენერალური პროკურორი შეიძლება თანამდებობიდან საკუთარი სურვილით გადადგომის შესახებ განცხადების საფუძველზეც წავიდეს, თუმცა ამისთვისაც პარლამენტის გადაწყვეტილებაა საჭირო.
რუსლან კრავჩენკო უკრაინის გენერალურ პროკურატურას 2025 წლის ივნისიდან ხელმძღვანელობდა.