ოპოზიციური პარტიების აკრძალვა არის საარჩევნო დაპირება და რა თქმა უნდა, ჩვენ ამ სარჩელს ბოლომდე მივიყვანთ – ამის შესახებ შალვა პაპუაშვილმა განაცხადა.
„ვფიქრობთ, რომ ძალიან დასაბუთებულია ჩვენი სარჩელი და ის პარტიები, რომლებიც ჩვენ დასახელებული გვყავს სარჩელში, არიან ანტიკონსტიტუციურები და ამისთვის გვაქვს ძალიან მყარი არგუმენტები, ამიტომ ჩვენ ვართ ძალიან დარწმუნებულები ჩვენ არგუმენტებში და დარწმუნებულები ვართ, შევძლებთ დავარწმუნოთ საკონსტიტუციო სასამართლო ამ არგუმენტების სისწორეში.
როდესაც ბრიუსელიდან გვესმის, რომ პარტიის აკრძალვა დემოკრატიაში როგორ შეიძლება. ძალიან კარგადაც შეიძლება, თუკი ანტიკონსტიტუციური პარტიაა, მას არაფერი ესაქმება პოლიტიკურ სივრცეში და ამას ითვალისწინებს ჩვენი კონსტიტუცია. ახლა ვისმე თუ სხვა წარმოდგენა აქვს, მიხედოს თავის კონსტიტუციას. ასე რომ, ეს არის არა მხოლოდ შინაარსობრივად მყარი, არამედ ეს არის დემოკრატიულად მყარი და ლეგიტიმური სარჩელი. არის საარჩევნო დაპირება და, რა თქმა უნდა, ჩვენ ამ სარჩელს ბოლომდე მივიყვანთ”, – განაცხადა პაპუაშვილმა.
2025 წლის 31 ოქტომბერს „ქართულმა ოცნებამ“ 3 პარტიის აკრძალვა მოითხოვა. ესენია: „ერთიანობა — ნაციონალური მოძრაობა“, „კოალიცია ცვლილებისთვის – გვარამია, მელია, გირჩი, დროა“, „ძლიერი საქართველო — ლელო, ხალხისთვის, თავისუფლებისთვის.“
სარჩელს „ოცნება“ იმით ასაბუთებს, რომ ამ პარტიების საქმიანობის მიზანია საქართველოს კონსტიტუციური წყობილების დამხობა და ძალადობით შეცვლა, საქართველოს დამოუკიდებლობის ხელყოფა და ტერიტორიული მთლიანობის დარღვევა. სარჩელის განხილვის დაწყების კანონით განსაზღვრული ვადა ივლისის ბოლოს იწურებოდა, თუმცა ამ ვადის ამოწურვამდე, 2026 წლის 20 აპრილს ოცნებამ საკონსტიტუციოში დაკორექტირებული სარჩელი შეიტანა და ასაკრძალი პარტიების სიას „ფედერალისტებიც“ დაამატა. ამის შემდეგ 9 თვიანი ვადის ათვლა ხელახლა დაიწყო.
როდის დაიწყებს საკონსტიტუციო სასამართლო „ქართული ოცნების“ სარჩელის განხილვას პარტიების აკრძალვასთან დაკავშირებით, ჯერჯერობით უცნობია. „ოცნების“ ლიდერები არ გამორიცხავენ, რომ მომავალში სასარჩელო სიას სხვა პარტიებიც დაამატონ.