Reuters: უკრაინის საკითხზე ახალი მოლაპარაკებები შესაძლოა არაბთა გაერთიანებულ საამიროებში ან შვეიცარიაში გაიმართოს

მათი თქმით, საუბარია უკრაინის, რუსეთისა და შეერთებული შტატების დელეგაციებს შორის მოლაპარაკებებზე. თუმცა გაურკვეველია, ორი მეომარი ქვეყნის წარმომადგენლები უშუალოდ ერთმანეთთან გამართავენ დიალოგს თუ აშშ-ის შუამავლობას მიმართავენ. ვაშინგტონის წარმომადგენლის განმარტებით, შესაძლო მოლაპარაკებების საბოლოო მიზანი უმაღლესი დონის შეხვედრის მომზადებაა.

ზელენსკი: მზად ვართ, თუნდაც ხვალ შევხვდეთ

უკრაინის პრეზიდენტმა ვოლოდიმირ ზელენსკიმ 23 ოქტომბერს განაცხადა, რომ მიღწეულია შეთანხმება უკრაინის, აშშ-ისა და რუსეთის სამმხრივი შეხვედრის გამართვის შესახებ, მოლაპარაკებების გუნდების დონეზე.

„შეხვედრას ნოემბრის პირველ ნახევარში ვგეგმავთ. მზად ვართ, ნებისმიერ დღეს შევხვდეთ — თუნდაც ხვალ. თუმცა ყველაფერი რუსებზეა დამოკიდებული“, — განაცხადა ზელენსკიმ ამერიკულ კონსერვატიულ ანალიტიკურ ცენტრ „ჰადსონის ინსტიტუტში“ ვიდეოკავშირით გამოსვლისას.

„აუცილებელია, ტექნიკურ დონეზე მიმდინარე სამმხრივი მოლაპარაკებებიდან ლიდერების შეხვედრაზე გადავიდეთ, რადგან საკვანძო საკითხების გადაწყვეტა მხოლოდ ამ დონეზეა შესაძლებელი“, — ხაზგასმით აღნიშნა მან.

მოსკოვის პოზიცია

მანამდე ცოტა ხნით ადრე კრემლმა განაცხადა, რომ სამმხრივი მოლაპარაკებები ნოემბრის პირველ ნახევარში აბუ-დაბიში გაიმართება. რუსეთის პრეზიდენტის პრესმდივნის, დმიტრი პესკოვის განმარტებით, განხილვის თემა ომის დასრულების შემდეგ რუსეთისა და უკრაინის უსაფრთხოება იქნება. მისი თქმით, ევროკავშირის წარმომადგენლები ამ მოლაპარაკებებს არ შეუერთდებიან.

ორი დღით ადრე რუსეთის პრეზიდენტმა ვლადიმირ პუტინმა სანქტ-პეტერბურგში აშშ-ის პრეზიდენტის სპეციალურ წარმომადგენელს, სტივენ უიტკოფს უმასპინძლა. მათი შეხვედრის შემდეგ რუსეთის პრეზიდენტის თანაშემწემ, იური უშაკოვმა განაცხადა, რომ რუსეთი მზადაა, აშშ-სა და უკრაინასთან სამმხრივი მოლაპარაკებები განაახლოს.

უკრაინის, რუსეთისა და აშშ-ის დელეგაციებმა აბუ-დაბიში დახურული მოლაპარაკებების ორი რაუნდი უკვე გამართეს. პირველი 23–24 იანვარს შედგა, მეორე კი — 4–5 თებერვალს. უკრაინაში ომის დასრულების გზაზე გარღვევა არცერთ რაუნდს არ მოჰყოლია.