აშშ-ის მონტგომერის სახელობის ფედერალური კლინიკის ანესთეზიისა და ქირურგიის დეპარტამენტების დირექტორი, ზურაბ გურული ამბობს, რომ ეროვნულ, სამაგისტრო და საგრანტო გამოცდებზე სტუდენტებისთვის სავალდებულოდ პირბადის გაკეთება არაჰუმანური გადაწყვეტილებაა.
მისი თქმით, ნიღაბი შესუნთქულ ჰაერში ჟანგბადის კონცენტრაციას ამცირებს, რაც დეჰიდრატაციას იწვევს, ეს კი – გონებრივი შესაძლებლობების გამოვლენის დაქვეითებასა და გონების დაკარგვას.
“სპეციალური სამედიცინო ნიღაბი – N95, შესუნთქულ ჰაერში ჟანგბადის კონცენტრაციას დაახლოებით 20%-ით ამცირებს. რაც შეეხება ე.წ. ქირურგიულ ნიღბებს, აქ ჯერჯერობით ვერ ჩამოყალიბდნენ პროცენტებზე, მაგრამ რამდენიმე მიმდინარე კვლევამ უკვე აჩვენა, რომ მჭიდროდ მორგებული ჩვეულებრივი ნიღაბიც იგივე პრობლემას იწვევს. ჯერჯერობით არ ჩანს დამაჯერებელი კვლევა, რომელიც ნიღაბის მიღმა სუნთქვისას ნახშირორჟანგის კონცენტრაციის ზრდის პროცენტებს დააფიქსირებდა.
ჩემი აზრით, გამოცდის ჩატარება ნიღაბში შესაძლოა ეპიდემიოლოგიური თვალსაზრისით გამართლებული იყოს, მაგრამ კლინიკურ-ჰუმანური თვალსაზრისით მიუღებელია. ბუნებრივად მომატებული ადრენალინი, ტვინის დაძაბული მუშაობა, პრაქტიკულად გარანტირებული დეჰიდრატაცია საკმარისი ეფექტებია იმისათვის, რომ დააქვეითოს გონებრივი შესაძლებლობების ადექვატური გამოვლენა და გამოიწვიოს გონების დაკარგვის ხშირი შემთხვევებიც”,- წერს ზურაბ გურული.
მისივე განცხადებით, გამოცდა შესაძლოა ჩატარდეს გაშლილ ტერიტორიაზე, სადაც ბუნებრივი ვენტილაცია იქნება და ინფექციის გავრცელების რისკები შემცირდება.
“ამ პრობლემის იდეალური გადაწყვეტა არ არსებობს, თუმცა შესაძლებელია გონივრული კონსენსუსის მიღწევა. მაგალითად, აუცილებლად გასათვალისწინებელია ის ფაქტი, რომ აბიტურიენტები თავისთავად მიეკუთვნებიან დაავადებისათვის ძალიან დაბალი რისკის ჯგუფს თავიანთი ასაკის გამო, შესაბამისად ზედმეტი კონსერვატიულობა საჭირო არ არის. შესაძლებელია გამოცდა ჩატარდეს ისეთ დარბაზში, სადაც კარგად იქნება საჭირო დისტანციები დაცული, რაც აგრეთვე შეამცირებს რისკს.
გამოცდა აგრეთვე შეიძლება ჩატარდეს გაშლილ ტერიტორიაზე, მხოლოდ ზემოდან დახურული ტენტის ქვეშ, სადაც ბუნებრივი ვენტილაცია მინიმუმამდე დაიყვანს ინფექციის გავრცელების შანსებს. აბიტურიენტებისათვის შედგენილი იქნას სავალდებულო ჰიგიენური წესების ნუსხა, თუნდაც როგორ მოახერხონ დაცემინება, ან შეიკავონ თავი ხმამაღალი საუბარისაგან, ახლო კონტაქტებისაგან და ა.შ. მოკლედ, გამოცდის სავალდებულო ჩატარება ნიღბებში არაჰუმანური გადაწყვეტილებაა და დარწმუნებული ვარ, ლოგიკური მსჯელობითა და მოქნილი აზროვნებით შესაძლებელი იქნება ამ პრობლემის მოხსნა”, – ამბობს ზურაბ გურული.
საკოორდინაციო საბჭოს გადაწყვეტილებით, გამოცდებზე გამოსაცდელთათვის სავალდებულო იქნება ნიღბის ტარება. მისი მოხსნის შემთხვევაში, გამოსაცდელები პირველ ჯერზე გაფრთხილებას მიიღებენ, შემდეგზე კი გამოცდას დაატოვებინებენ.
გარდა ამისა, აუდიტორიებში ჩართული არ იქნება კონდიციონერი, თუმცა ფანჯრები იქნება ღია.