შინაგან საქმეთა სამინისტროს ინფორმაციით თბილისის პოლიციის დეპარტამენტის ვაკე-საბურთალოს სამმართველოს თანამშრომლებმა თბილისსა და მცხეთა-მთიანეთის რეგიონში მომხდარი მსხვილფეხა პირუტყვის ქურდობის ფაქტები გახსნეს და ხუთი პირი დააკავეს, რომლებიც თბილისსა და მცხეთის რაიონში, ჯვრის მონასტრის მიმდებარე ტერიტორიებიდან სისტემატურად იპარავდნენ მსხვილფეხა პირუტყვს და ყიდდნენ. ხუთივე პირი პოლიციამ იმ დროს დააკავა, როცა მათ მცხეთის რაიონში, ჯვრის მონასტრის მიმდებარე ტერიტორიიდან ერთ–ერთი მოქალაქის მსხვილფეხა პირუტყვი მოიპარეს და მიმალვას ცდილობდნენ.
დაკავებულები წარსულში სხვადასხვა დანაშაულისთვის არიან ნასამართლევი, 4 მათგანი კი დანაშაულის ჩადენის მომენტში პირობითი მსჯავრის ქვეშ იმყოფებოდა. დაკავებულებს ბრალი წინასწარი შეთანხმებით ჯგუფის მიერ დიდი ოდენობით ჩადენილ ქურდობაში ედებათ.
დაკავებულები არიან: 1985 წელს დაბადებული ი.ბ., 1990 წელს დაბადებული გ.ბ., 1996 წელს დაბადებული გ.ბ., 1985 წელს დაბადებული დ.ფ. და 1986 წელს დაბადებული ნ.ბ. მათ მიერ ჩადენილი დანაშაული 4-დან 7 წლამდე ვადით თავისუფლების აღკვეთას ითვალისწინებს.
