ეკა ბესელიას პირადი ცხოვრების ამსახველი კადრების სოციალურ ქსელში გავრცელებას ევროპული საქართველოს ლიდერი, გიგი უგულავა ფეისბუქის გვერდზე გამოქვეყნებულ სტატუსში აფასებს:
საკუთარი გუნდის წევრი ქალების ურჩობისთვის დასჯის ასეთი სასტიკი და არადამიანური მეთოდი სიგნალია სხვებისთვისაც, რომ ჭკვიანად იყვნენ. ამჯერად, ასეთი ფორმით ქ-ნ ბესელიას იძულება ხდება, რომ დატოვოს ოცნება. ამის შემდეგ ივანიშვილს იმედი აქვს, რომ სასურველ მოსამართლეებს გაიყვანს. აქ ის ძალიან სცდება. ეს მონა მონსტრები უზენაესის უვადო მოსამართლეები ვერ გახდებიან არა იმიტომ, რომ ბესელია-გედევანს არ უნდათ, არამედ იმიტომ რომ საზოგადოების უკლებლივ ყველა ჯგუფია წინააღმდეგი, მათ შორის ოცნების უპირობო მომხრეებიც კი. ამ საქმის საფუძვლიანი გამოძიების და დამნაშავეების დასჯის გარეშე, კადრების გავრცელებაზე პასუხისმგებლობა მთლიანად ივანიშვილის და ამ ხელისუფლების კისერზე იქნება!
ინფორმაცია იმის შესახებ, რომ სოციალურ ქსელში ეკა ბესელიას პირადი ცხოვრების ამსახველი კადრები გავრცელდა დღეს ქართული ოცნების ყოფილმა წევრმა, დავით ჭიჭინაძემ გაავრცელა. მისი თქმით, ქვეყანაში პირადი ცხოვრების ამსახველი კადრებით შანტაჟი უნდა დასრულდეს და რაც შეიძლება მალე გაირკვეს, ვინ დგას ამ ყველაფრის უკან.
მე დღეს ვერავის ვერაფერს დავაბრალებ და ვერაფერს ვერ დავუკავშირებ, მაგრამ ერთი რამ არის, რომ როდესაც იძაბება ქვეყანაში პოლიტიკური ვითარება, მაშინ იწყება ხოლმე კონკრეტულად და იმ ადამიანების მიმართ ტერორი, ვინც ამ ქვეყანაში სამართლიანობისათვის იბრძვის”, – განაცხადა დავით ჭიჭინაძემ.
მოგვიანებით ის შინაგან საქმეთა სამინისტროში გამოკითხვაზე დაიბარეს. შსს–მ კადრების გავრცელების ფაქტზე გამოძიება დაიწყო.
