დიდი ბრიტანეთის პრემიერ-მინისტრმა კირ სტარმერმა განაცხადა, რომ თანამდებობას ტოვებს. ქვეყნის მთავრობა შესაძლოა ენდი ბერნემმა ჩაიბაროს — დიდი მანჩესტერის უკვე ყოფილმა მერმა, რომელმაც გასულ კვირას ინგლისის ჩრდილო-დასავლეთში, მეიკერფილდის ოლქში, პარლამენტის დეპუტატის ვადამდელ არჩევნებში დამაჯერებელი გამარჯვება მოიპოვა.
სტარმერის განცხადებით, მან თავისი გადაწყვეტილების შესახებ უკვე აცნობა დიდი ბრიტანეთის მეფე ჩარლზს. მისივე თქმით, პრემიერ-მინისტრის პოსტზე დარჩება მანამდე, სანამ ლეიბორისტული პარტიის ახალი ლიდერი არ აირჩევა.
დაუნინგ-სტრიტთან გამოსვლისას სტარმერმა თავისი მთავრობის მიღწევები ჩამოთვალა. ამასთან, აღნიშნა, რომ პარტიაში სულ უფრო ხშირად ისმოდა კითხვა, არის თუ არა ის საუკეთესო ლიდერი, რომელიც ლეიბორისტებს შემდეგ საყოველთაო არჩევნებზე წაიყვანდა.
„ამ კითხვაზე პასუხი ჩემი პარტიის საპარლამენტო ფრაქციისგან მოვისმინე და ამ პასუხს ღირსეულად ვიღებ“, — განაცხადა სტარმერმა.
მისი თქმით, მან ლეიბორისტული პარტიის აღმასრულებელ კომიტეტს სთხოვა, ახალი ლიდერის არჩევის პროცესი მოაწყოს. პროცესი 9 ივლისს უნდა დაიწყოს და 16 ივლისამდე დასრულდეს, სანამ პარლამენტის წევრები ზაფხულის არდადეგებზე გავლენ.
სტარმერის განცხადებიდან მალევე ენდი ბერნემმა დაადასტურა, რომ მთავრობის ხელმძღვანელობა სურს და ლეიბორისტული პარტიის ლიდერის პოსტზე საკუთარი კანდიდატურის წარდგენას აპირებს.
მან განცხადება გამოაქვეყნა, რომელშიც სტარმერს ლიდერობისთვის მადლობა გადაუხადა და აღნიშნა, რომ „ქვეყანა სტაბილურობას, სერიოზულობას და ყველაზე მნიშვნელოვან საკითხებზე მუდმივ ყურადღებას ელოდება“. „სწორედ ამას მიიღებს ის“, — პირობა დადო ბერნემმა.
ლეიბორისტულ პარტიაში ბევრი იმედოვნებს, რომ ბერნემი ამ პოლიტიკურ ძალას ნაიჯელ ფარაჯის მემარჯვენე-პოპულისტური პარტია Reform UK-ისგან მომდინარე საფრთხის დაძლევაში დაეხმარება. სოციოლოგების მონაცემებით, Reform UK კვლავ ყველაზე პოპულარულ პოლიტიკურ ძალად რჩება ქვეყანაში.
მეიკერფილდის არჩევნებში ბერნემმა მნიშვნელოვანი უპირატესობით დაამარცხა Reform UK-ის კანდიდატი, მიუხედავად იმისა, რომ ამ რეგიონში პარტიას მაღალი რეიტინგი ჰქონდა.
დიდ ბრიტანეთში საყოველთაო არჩევნები არაუგვიანეს 2029 წლის აგვისტოსი უნდა გაიმართოს. ამიტომ ლეიბორისტები იმედოვნებენ, რომ ამ დრომდე ამომრჩეველთა სიმპათიის ხელახლა მოპოვებას შეძლებენ.
სტარმერი თანამდებობას ტოვებს ლეიბორისტული პარტიისთვის წარუმატებელი ადგილობრივი არჩევნების შემდეგ, რომელიც 7 მაისს გაიმართა. ამ არჩევნების შედეგად სერიოზული დანაკარგები განიცადეს როგორც მმართველმა ლეიბორისტებმა, ისე კონსერვატორებმა — მათ ხმების მნიშვნელოვანი ნაწილი Reform UK-ს, შედარებით ნაკლებად კი მწვანეთა პარტიას დაუთმეს.
სტარმერის გადადგომა ნიშნავს, რომ დიდი ბრიტანეთი ბოლო ათ წელზე ოდნავ მეტ პერიოდში უკვე მეშვიდე მთავრობის მეთაურს მიიღებს.
კირ სტარმერის ხელმძღვანელობით დიდი ბრიტანეთის მთავრობა ხელისუფლებაში 2024 წლის ივლისის დასაწყისში ჩატარებული საყოველთაო არჩევნების შედეგად მოვიდა. ამ არჩევნებზე ლეიბორისტულმა პარტიამ მანამდე მმართველ კონსერვატორებს გამანადგურებელი მარცხი აგემა და პარლამენტში რეკორდული რაოდენობის დეპუტატი შეიყვანა.