საქართველოდან 2026 წლის 24 სექტემბერს ექსტრადირებული პატიმარი, დმიტრი პუშკარევი, რუსეთში, გაქცევის მცდელობისას მოკლეს.
რუსეთის სამართალდამცავი უწყებების ოფიციალური ინფორმაციით, ყაბარდო-ბალყარეთის რესპუბლიკის ტერიტორიაზე, ვლადიკავკაზი–ადლერის მარშრუტის სამგზავრო მატარებლის სპეციალურ ვაგონში პატიმარი დმიტრი პუშკარევი ბადრაგს დაესხა თავს, რის შემდეგაც ის საპასუხო სროლის შედეგად ადგილზევე იქნა ლიკვიდირებული.
რუსეთის საგამოძიებო კომიტეტისა და FSIN-ის განცხადებით, ინციდენტი რკინიგზის სადგურ „მურტაზოვოსთან“ ახლოს მოხდა. პატიმარმა პუშკარევმა კამერიდან საპირფარეშოში გაყვანა მოითხოვა, რა დროსაც ბადრაგის ერთ-ერთ წევრს სამსახურებრივი ცეცხლსასროლი იარაღი გამოსტაცა და დერეფანში მყოფ თანამშრომლებს ცეცხლი გაუხსნა.
მიყენებული ჭრილობებისგან სტავროპოლის მხარის FSIN-ის სამმართველოს ოფიცერი საავადმყოფოსკენ მიმავალ გზაზე გარდაიცვალა, ხოლო დაჭრილი ოთხი თანამშრომელი კლინიკაში გადაიყვანეს, სადაც ორი მათგანის მდგომარეობა რეანიმაციაში კვლავ მძიმეა.
უწყებამ კატეგორიულად უარყო თავდაპირველად გავრცელებული ვერსია პატიმართა მასობრივი ამბოხების შესახებ და მომხდარს ერთი პირის მიერ გაქცევის მიზნით განხორციელებული თავდასხმა უწოდა. მომხდარ ფაქტზე რუსეთის საგამოძიებო კომიტეტმა სისხლის სამართლის საქმე სამართალდამცავის სიცოცხლის ხელყოფისა და იარაღის გატაცების მუხლებით აღძრა.
რუსეთის შინაგან საქმეთა სამინისტროსა და გენერალური პროკურატურის მასალების მიხედვით, 43 წლის დმიტრი პუშკარევს რუსეთის სამართალდამცავი ორგანოები ინტერნეტის საშუალებით ნარკოტიკული საშუალებების მასშტაბურ წარმოებასა და ორგანიზებული დანაშაულებრივი დაჯგუფების შექმნაში ადანაშაულებდნენ, რის გამოც მასზე საერთაშორისო ძებნა იყო გამოცხადებული. ძებნილი პირი საქართველოში იქნა დაკავებული, რის შემდეგაც ქართულმა მხარემ მისი რუსეთში ექსტრადიციის გადაწყვეტილება მიიღო. რუსეთის გენერალური პროკურატურის ოფიციალური ცნობით, ბრალდებულის გადაცემა რუსული მხარისთვის სასაზღვრო გამშვები პუნქტის, „ზემო ლარსის“ გავლით განხორციელდა. მას სამუდამო პატიმრობა ემუქრებოდა.