„თანამშრომლობამ აზრი დაკარგა“ – გერმანიის საგარეო უწყება და ბუნდესტაგის დეპუტატები თბილისის გადაწყვეტილებებს მკაცრად აკრიტიკებენ

გერმანიის მთავრობა სინანულს გამოთქვამს თბილისში ადენაუერისა და ნაუმანის ფონდების ოფისების დახურვის გამო. გერმანიის ხელისუფლება ამ ნაბიჯს საქართველოს სამოქალაქო საზოგადოებაზე დარტყმად და ქვეყნის ევროკავშირისგან შემდგომი დაშორების ნიშნად მიიჩნევს. ამის შესახებ Deutsche Welle წერს.

გამოცემის თანახმად, გერმანიის ხელისუფლება სინანულს გამოთქვამს თბილისში ორი გერმანული პოლიტიკური ფონდის წარმომადგენლობის დახურვის გამო. ეს, უპირველეს ყოვლისა, არის „დიდი დანაკარგი საქართველოსა და ქართული საზოგადოებისთვის“, — განაცხადა გერმანიის საგარეო საქმეთა სამინისტროს ოფიციალურმა წარმომადგენელმა მარტინ გიზემ (Martin Giese), როდესაც კომენტარი გააკეთა კონრად ადენაუერისა და ფრიდრიხ ნაუმანის ფონდების საქართველოს ოფისების დახურვაზე. მისი თქმით, გერმანიის საგარეო პოლიტიკური უწყება ყურადღებით აკვირდება სიტუაციას და კავშირზეა პარტიულ ფონდებთან. გერმანულ პოლიტიკურ ფონდებს მრავალი წლის განმავლობაში მნიშვნელოვანი წვლილი შეჰქონდათ საქართველოში დემოკრატიისა და სამოქალაქო საზოგადოების განვითარებაში, – აღნიშნა გიზემ.

უწყების წარმომადგენლის განცხადებით, გერმანიის საგარეო საქმეთა სამინისტრომ საქართველოს ხელისუფლებას მკაფიოდ განუცხადა, რომ მათთვის „სრულიად გაუგებარია მიღებული გადაწყვეტილებების მიზეზები“. მან ასევე ხაზი გაუსვა საქართველოში მიმდინარე მძიმე შიდაპოლიტიკურ კრიზისს, რამაც ევროკავშირში გაწევრიანების მოლაპარაკებების შეჩერება გამოიწვია. მისივე თქმით, ეჭვგარეშეა, რომ საქართველოს მთავრობის მიერ ამჟამინდელი კურსის გაგრძელება „ადრე თუ გვიან შეუთავსებელი გახდება ევროკავშირის კანდიდატის სტატუსის შენარჩუნებასთან“.

თავის მხრივ, გერმანიის ეკონომიკური თანამშრომლობისა და განვითარების სამინისტროს წარმომადგენელმა ფილიპ გაიგერმა (Philipp Geiger) შეახსენა საზოგადოებას, რომ ბერლინი ადრე მხარს უჭერდა საქართველოს ევროპულ კურსს, მაგრამ ამჟამინდელი მთავრობის პირობებში ასეთმა თანამშრომლობამ აზრი დაკარგა. ამიტომ, 2024 წლის დეკემბერში ეკონომიკური თანამშრომლობისა და განვითარების სამინისტრომ შეაჩერა საქართველოსთან ერთობლივი პროექტების განხორციელება, რომელთა საერთო ღირებულება 237 მილიონ ევროს შეადგენს. ამით ბერლინმა უპასუხა საქართველოს მთავრობის უარს ევროკავშირთან დაახლოების კურსზე, დაამატა გაიგერმა.

ამავდროულად, გერმანია-სამხრეთ კავკასიის საპარლამენტო ჯგუფის თავმჯდომარის მოადგილემ დანიელ კოლბლმა (Daniel Kölbl) DW-სთან ინტერვიუში განაცხადა, რომ ეს არის „უკან გადადგმული ნაბიჯი გერმანია-საქართველოს ურთიერთობებში, რაც მოწმობს საქართველოს შემდგომ დაშორებაზე სამართლებრივი სახელმწიფოსა და დემოკრატიის პრინციპებისგან“. ბუნდესტაგის დეპუტატის თქმით, ეს იძულებითი გადაწყვეტილება კიდევ ერთხელ ართულებს ბერლინისა და თბილისის ურთიერთობებს და განსაკუთრებით აისახება საქართველოს ახალგაზრდა თაობაზე, რომელიც ღიაა ევროპისთვის და აფასებს ევროკავშირის ღირებულებებს — თავისუფლებასა და კანონის უზენაესობას.

გერმანიამ და ევროკავშირმა უნდა განიხილონ საქართველოს მთავრობის მიმართ პოზიციის გამკაცრება, აღნიშნა შემდგომში გერმანელმა დეპუტატმა. „ის, თუ როგორ მოქმედებს ახლა საქართველოს მთავრობა, არ ქმნის ევროკავშირში გაწევრიანების პერსპექტივას. ჩვენთვის ხომ კანონის უზენაესობასა და დემოკრატიას ფუნდამენტური მნიშვნელობა აქვს. და თუ საქართველოში მშვიდობიანი პროტესტი ძალით იხშობა, ეს არ არის ის საფუძველი, რომელზედაც შესაძლებელია ევროკავშირში გაწევრიანების შესახებ მოლაპარაკებების გაღრმავება“, — დასძინა მან.