უკრაინის შეიარაღებულმა ძალებმა უპილოტო საფრენი აპარატებით მოსკოვს, რუსეთის მიერ ანექსირებულ ყირიმსა და ტულის ოლქს შეუტიეს. რუსეთის თავდაცვის სამინისტრომ პარასკევს, 26 ივნისის დილით განაცხადა, რომ 660 უპილოტო საფრენი აპარატი გაანადგურა ბელგოროდის, ბრიანსკის, კურსკის, ორიოლის, კალუგის, ლიპეცკის, როსტოვის, ვორონეჟის, ტულის, რიაზანისა და ასტრახანის ოლქების, მოსკოვისა და მოსკოვის ოლქის, ანექსირებული ყირიმის, ასევე შავი და აზოვის ზღვების აკვატორიების თავზე.
ტულის ოლქში შეტევის სამიზნე გახდა ქიმიური კომბინატი „აზოტი“. Telegram-არხ Astra-ს მონაცემებით, დრონები მთელი ღამის განმავლობაში უტევდნენ ტულის ოლქის ქალაქ ნოვომოსკოვსკში მდებარე ქიმკომბინატ „აზოტს“. გამოცემა ადგილობრივ მოსახლეობაზე დაყრდნობით წერს, რომ ქალაქში დიდი რაოდენობით აფეთქების ხმა ისმოდა. საწარმოზე თავდასხმა 14 ივნისსაც განხორციელდა. „აზოტის“ ვებგვერდზე გამოქვეყნებული ინფორმაციის თანახმად, ის რუსეთის უმსხვილესი მწარმოებელია ამიაკისა და აზოტოვანი სასუქების მიმართულებით.
უკრაინული რესურსი Exilenova+ ასევე იუწყება ტულის ოლქზე მასირებული შეტევის შესახებ, რომლის სამიზნეც ქარხანა „აზოტი“ იყო. „აფეთქებები და უპილოტო საფრენი აპარატების გადაფრენა რამდენიმე საათის განმავლობაში ისმოდა. ადგილობრივები ჰაერში ამიაკის უჩვეულო სუნსა და ელექტრომომარაგების პრობლემებზე საუბრობენ“, — ნათქვამია ცნობაში. Exilenova+ ასევე აღნიშნავს, რომ „აზოტის“ მიერ წარმოებული ნედლეული ასაფეთქებელი ნივთიერებებისა და საბრძოლო მასალის წარმოებაში გამოიყენება.
NASA FIRMS-ის სერვისის ფოტოებზე ჩანს ხანძარი ნოვომოსკოვსკის თბოელექტროსადგურის ტერიტორიაზე, რომელიც „აზოტის“ სტრუქტურაში შედის. ტულის ოლქის გუბერნატორმა დმიტრი მილიაევმა Telegram-ში დაწერა მის რეგიონზე „უკრაინული უპილოტო საფრენი აპარატების მასირებული შეტევის“ შესახებ. მისი თქმით, შჩიოკინოს რაიონის ერთ-ერთ დასახლებულ პუნქტში დაზიანდა კერძო საცხოვრებელი სახლი, რის შედეგადაც ქალი დაშავდა. გარდა ამისა, დაფიქსირდა დაზიანებები ელექტროგადამცემი ხაზისა და ნოვომოსკოვსკში მდებარე სამრეწველო საწარმოს ტერიტორიაზე. მილიაევის ცნობით, განადგურდა 157 უკრაინული უპილოტო საფრენი აპარატი.
მოსკოვსა და ყირიმზე თავდასხმების შესახებაც ვრცელდება ცნობები. მოსკოვის მერმა სერგეი სობიანინმა ღამით და დილით ადრე სოციალურ ქსელებში 47 დრონის შეტევის შესახებ დაწერა და საგანგებო სამსახურების მუშაობის შესახებ განაცხადა. სხვა დეტალები მას არ გაუვრცელებია. შეტევის ფონზე შეზღუდვები დაწესდა მოსკოვის დომოდედოვოს, ვნუკოვოსა და შერემეტიევოს აეროპორტებში — რეისების მიღება და გაშვება შეთანხმების საფუძველზე ხორციელდებოდა. რა ობიექტები იყო შეტევის სამიზნე, ჯერჯერობით უცნობია.
უპილოტო საფრენი აპარატების იერიშებზე იუწყებიან ყირიმშიც. ადგილობრივი მოსახლეობა ქერჩზე თავდასხმის შესახებ წერს. NASA FIRMS-ის სერვისმა ხანძარი დააფიქსირა საჰაერო თავდაცვის სისტემების — „პანცირ-S1“-ის — დისლოკაციისა და აეროდრომის მიმდებარე რაიონში.
ამავე დროს, „კომერსანტმა“ რუსეთის თავდაცვის სამინისტროს ცნობებზე დაყრდნობით დაითვალა, რომ 2026 წლის დასაწყისიდან უკრაინამ, რომელიც რუსეთის სამხედრო აგრესიისგან თავს იცავს, რუსეთსა და ანექსირებულ ყირიმს თითქმის 40 ათასი უპილოტო საფრენი აპარატით შეუტია. საშუალოდ, რუსეთის თავდაცვის უწყება თვეში დაახლოებით 6 ათასი დრონის განადგურების შესახებ იუწყებოდა, ივნისის დასაწყისიდან კი ეს მაჩვენებელი უკვე 9,7 ათასს აღწევს.
საშუალო დღიური მაჩვენებელი 223 უპილოტო საფრენ აპარატს შეადგენს. ყველაზე მასირებული შეტევები იყო 17 მაისის ღამეს — 556 დრონი, 18 ივნისის ღამეს — 555 დრონი და 25 მარტის ღამეს — 389 დრონი. ყველაზე ხშირად უპილოტო საფრენ აპარატებს ბელგოროდის, კურსკისა და ბრიანსკის ოლქების, ასევე ოკუპირებული ყირიმის თავზე ანადგურებენ. პირველ ათეულში ასევე შედიან კრასნოდარის მხარე, მოსკოვის რეგიონი — მოსკოვი და მოსკოვის ოლქი — ტულისა და ორიოლის ოლქები.