იაკუტიის სასამართლომ ძალაში დატოვა გადაწყვეტილება ცნობილი იაკუტელი შამანის, ალექსანდრ გაბიშევის იძულებითი ფსიქიატრიული მკურნალობის ვადის გაგრძელების შესახებ.
სასამართლო კოლეგიამ უარი თქვა დაცვის მხარის შუამდგომლობაზე, რომელიც მოსკოვის სერბსკის სახელობის ინსტიტუტში დამოუკიდებელი, ობიექტური ფსიქიატრიული ექსპერტიზის ჩატარებას ითხოვდა.
სასამართლოს დღევანდელი განჩინებით, გაბიშევი სპეციალიზებულ კლინიკაში სულ მცირე მიმდინარე წლის 18 დეკემბრამდე დარჩება.
შამანი ალექსანდრ გაბიშევი რუსეთში ე.წ. „სასჯელაღსრულებითი ფსიქიატრიის“ ყველაზე ცნობილ თანამედროვე მსხვერპლად ითვლება. ის უკვე თითქმის ექვსი წელია იზოლაციაში იმყოფება.
გაბიშევის წინააღმდეგ რეპრესიული მანქანა მას შემდეგ ამოქმედდა, რაც მან 2019 წელს იაკუტიიდან მოსკოვისკენ ფეხით მსვლელობა დაიწყო. მისი გაცხადებული მიზანი კრემლიდან ვლადიმერ პუტინის „განდევნა“ იყო, რომელსაც შამანმა საჯაროდ „დემონი“ უწოდა.
გზაში მასობრივი მხარდაჭერის ფონზე, გაბიშევი სპეცრაზმმა დააკავა. მას „ექსტრემიზმისკენ საჯარო მოწოდებები“ დასდეს ბრალად, თუმცა ციხის ნაცვლად საქმე ფსიქიატრიულ საავადმყოფოში იძულებით გამოკეტვით დასრულდა.
რუსეთის ოფიციალური პოზიციაა, რომ ალექსანდრ გაბიშევი ფსიქიკურად ავად არის და საზოგადოებისთვის საფრთხეს წარმოადგენს. ამიტომ უკვე თითქმის 6 წელია იძულებით ფსიქიატრიულ კლინიკაში ჰყავთ.
გაბიშევის ადვოკატები, დამოუკიდებელი ექსპერტები და უფლებადამცველი ორგანიზაციები (მემორიალი, Amnesty International, USCIRF და სხვები) საპირისპიროს ამბობენ: რომ ის პოლიტიკური მიზეზით არის იზოლირებული და ადრე უსურიისკის ექიმები წერდნენ, რომ ის საფრთხეს არ წარმოადგენს. სამედიცინო და უფლებადამცველი ორგანიზაციების დასკვნით, ალექსანდრ გაბიშევი ფსიქიკურად სრულიად ნორმალური და ადეკვატური ადამიანია. მისი „გიჟად“ გამოცხადება კი კრემლის მხრიდან პოლიტიკური გადაწყვეტილებაა.
