ბერლინის მახლობლად, ტყეში იარაღის სამალავი აღმოაჩინეს. გერმანიის დაზვერვა მიიჩნევს, რომ ეს იარაღი რუსეთის დაკვეთით მკვლელობებისთვის იყო განკუთვნილი

რა არის ცნობილი რუმინეთში დაკავებული ეჭვმიტანილის შესახებ

როგორც გერმანიის შინაგან საქმეთა მინისტრმა განაცხადა, პროკურატურა სწავლობს, შესაძლოა თუ არა ამ საქმესთან კავშირი ჰქონდეს პირს, რომელიც რუმინეთში დააკავეს ამანათებში ჩამონტაჟებული ასაფეთქებელი მოწყობილობებით თავდასხმების დაგეგმვის საქმეში ეჭვმიტანილად.

დობრინდტს ეჭვმიტანილის მოქალაქეობა არ დაუკონკრეტებია, თუმცა ის აღწერა როგორც „დაბალი რგოლის აგენტი“, რომელმაც საკუთარი ხელმძღვანელობის სრული შემადგენლობა არ იცოდა. მინისტრის თქმით, წელს უკვე დააკავეს რამდენიმე ასეთი სავარაუდო შემსრულებელი, მათ შორის ყაზახეთის მოქალაქეც.

AFP-ის წყარომ რუმინეთის პოლიციაში განაცხადა, რომ ბერლინის იარაღის სამალავთან კავშირში ეჭვმიტანილია უკრაინის ორი მოქალაქიდან ერთ-ერთი, რომლებიც გასული წლის ოქტომბერში რუმინეთში რუსეთის დაკვეთით თავდასხმების ორგანიზების ბრალდებით დააკავეს.

იმ დროს რუმინეთის პოლიცია აცხადებდა, რომ 20-დან 30 წლამდე ასაკის ორი უკრაინელი პოლონეთიდან ბუქარესტში ჩავიდა და „საერთაშორისო საკურიერო კომპანიის ოფისში ორი ამანათი ჩააბარა, რომლებშიც თვითნაკეთი მოწყობილობები იყო მოთავსებული“.

„მათი მიზანი ამ შენობის ხანძრის გაჩენის გზით განადგურება იყო“, — ნათქვამი იყო პოლიციის პრესრელიზში.

რუმინეთის საგარეო დაზვერვის სამსახურმა განაცხადა, რომ უკრაინის ეს მოქალაქეები დაკავშირებული იყვნენ „ევროპის ქვეყნების წინააღმდეგ მოქმედ ფართო დივერსიულ ქსელთან, რომელსაც რუსეთის სპეცსამსახურები აკონტროლებდნენ“.

რუმინეთის ხელისუფლება აცხადებდა, რომ „აღკვეთა ახალი დივერსიული ოპერაცია, რომელიც რუსეთის ფედერაციამ რუმინეთის ტერიტორიაზე მოაწყო“.

როგორც გაზეთი Süddeutsche Zeitung და ტელეკომპანიები NDR და WDR გერმანიის კონსტიტუციის დაცვის ფედერალური უწყების (BfV) წყაროებზე დაყრდნობით იუწყებიან, ამ უწყებაში მიიჩნევენ, რომ იარაღის სამალავი რუსეთის დაზვერვას ეკუთვნოდა.

„გერმანიის უსაფრთხოების სამსახურები დარწმუნებული არიან, რომ იარაღი განკუთვნილი იყო აგენტებისთვის, რომლებსაც მოსკოვის დავალებით ქვეყანაში ე.წ. „კინეტიკური ოპერაციები“ უნდა განეხორციელებინათ — სხვა სიტყვებით რომ ვთქვათ, მკვლელობები“, — ნათქვამია პუბლიკაციებში.

ჟურნალისტები იხსენებენ, რომ BfV-ის ხელმძღვანელი სინან სელენი უკვე დიდი ხანია ბერლინში დახურულ შეხვედრებზე აფრთხილებდა ოფიციალურ პირებს, რომ რუსეთის სპეცსამსახურებმა ტაქტიკა გააქტიურეს და ახლა გერმანიაში შეკვეთილი მკვლელობების დაგეგმვასაც ახორციელებენ.

„გავრცელებული ინფორმაციით, მოსკოვის სამიზნეების სიაში შედიან თავდაცვის ინდუსტრიის ხელმძღვანელები, ემიგრაციაში მყოფი ოპოზიციონერები და უკრაინის სხვადასხვა მხარდამჭერი“, — აღნიშნავენ პუბლიკაციის ავტორები.

გერმანიაში რუსეთის საელჩომ ჟურნალისტების თხოვნას, კომენტარი გაეკეთებინა ამ ბრალდებებზე, არ უპასუხა.

პარასკევს გამართულ პრესკონფერენციაზე დობრინდტმა უარი თქვა დაედასტურებინა ცნობები, რომ იარაღის სამალავი რუსეთთან იყო დაკავშირებული, თუმცა განაცხადა, რომ „უცხო სახელმწიფოების შესაძლო მონაწილეობას“ არ გამორიცხავს.

როგორც BBC-ის კორესპონდენტი გერმანიაში ბეთანი ბელი აღნიშნავს, გერმანიის ხელისუფლება ეჭვობს, რომ  რუსეთი ქვეყნის ტერიტორიაზე თავდასხმების მთელი სერიის ორგანიზებაშია ჩარეული.

2024 წელს CNN-მა გაავრცელა ინფორმაცია, რომ მოსკოვი გერმანიის უმსხვილესი თავდაცვითი კონცერნის Rheinmetall-ის ხელმძღვანელის, არმინ პაპერგერის მკვლელობას გეგმავდა. ამ ცნობამ გერმანელი პოლიტიკოსები შოკში ჩააგდო და მათ ხელისუფლებისგან გადამჭრელი ზომების მიღება მოითხოვეს.

2021 წელს გერმანიის სასამართლომ რუსეთის მოქალაქეს და FSB-ის სპეცრაზმელს, ვადიმ კრასიკოვს, ბერლინის პარკში ჩეჩნეთის ყოფილი საველე მეთაურის, ზელიმხან ხანგოშვილის მკვლელობისთვის სამუდამო პატიმრობა მიუსაჯა.

მოგვიანებით კრასიკოვი რუსეთსა და დასავლეთის ქვეყნებს შორის პატიმრების მასშტაბური გაცვლის ფარგლებში რუსეთში დაბრუნდა.