რუსეთში შეერთებული შტატების ცენტრალური სადაზვერვო სააგენტოს (CIA) დირექტორი ჯონ რეტკლიფი ჩავიდა. ამის შესახებ სამშაბათს, 25 აგვისტოს, თეთრ სახლში CBS-ის კორესპონდენტი ჯენიფერ ჯეიკობსი და Axios-ის ჟურნალისტი ბარაკ რავიდი წყაროებზე დაყრდნობით წერენ. რავიდი ინფორმაციას ანონიმ ამერიკელ ოფიციალურ პირებზე დაყრდნობით ავრცელებს.
ჯეიკობსის ცნობით, რეტკლიფი მოსკოვში C-17-ის ტიპის სამხედრო-სატრანსპორტო თვითმფრინავით ჩავიდა, რათა „შეხვედრები გამართოს“. რავიდის ინფორმაციით, 23 აგვისტოს CIA-ის დირექტორი ვაშინგტონიდან რიგაში გაფრინდა, ხოლო 25 აგვისტოს ლატვიის დედაქალაქიდან მოსკოვში გაემგზავრა.
აშშ-მა უკრაინას დროებით მოსკოვსა და სანქტ-პეტერბურგზე თავდასხმებისგან თავის შეკავება სთხოვა
რავიდის ცნობით, ამერიკულმა მხარემ უკრაინას წინასწარ აცნობა მაღალი რანგის დელეგაციის მოსკოვში ვიზიტის შესახებ და სთხოვა, არ დაერტყა რუსეთის დედაქალაქისთვის იმ პერიოდში, როდესაც იქ ამერიკელი ოფიციალური პირები იმყოფებიან.
ეს ინფორმაცია X-ზე დაადასტურა Financial Times-ის მთავარმა კორესპონდენტმა უკრაინაში კრისტოფერ მილერმაც. მისი თქმით, დონალდ ტრამპის ადმინისტრაციამ უკრაინის ხელისუფლებას გასულ კვირას სთხოვა, 24, 25 და 26 აგვისტოს დრონებითა და შორი მოქმედების რაკეტებით არ დაერტყა მოსკოვისთვის, სანქტ-პეტერბურგისა და რუსეთის ჩრდილოეთ რეგიონებისთვის.
ანალოგიური ინფორმაცია წყაროზე დაყრდნობით გაავრცელა „РБК-Украина“-მაც. მილერის ცნობით, კიევი ვაშინგტონის თხოვნას დათანხმდა.
დილით რუსეთში პირველად 9 წლის განმავლობაში აშშ-ის სამხედრო-სატრანსპორტო თვითმფრინავი დაეშვა
25 აგვისტოს დილით ვნუკოვოს აეროპორტში აშშ-ის საჰაერო ძალების Boeing C-17 Globemaster III დაეშვა. თვითმფრინავის ჩასვლის შესახებ მედიამ Flightradar24-ის მონაცემებზე დაყრდნობით გაავრცელა ინფორმაცია. მოგვიანებით Telegram-არხებზე ვნუკოვოდან დამადასტურებელი კადრებიც გამოჩნდა.
სოციალურ ქსელებში ასევე გავრცელდა ვიდეოები, რომლებშიც ჩანს მოსკოვში მოძრავი ამერიკელი დიპლომატების კორტეჟი.
Mash-ის ინფორმაციით, ასეთი ტიპის ამერიკული სამხედრო თვითმფრინავი რუსეთში 2017 წლის შემდეგ არ ჩასულა.
რუსეთის პრეზიდენტის პრესმდივანმა დმიტრი პესკოვმა, ჯეიკობსის პოსტის გამოქვეყნებამდე, ჟურნალისტების კითხვაზე განაცხადა, რომ ვნუკოვოში ამერიკული თვითმფრინავის ჩასვლის შესახებ „ინფორმაციას არ ფლობდა“. მან ასევე აღნიშნა, რომ მიმდინარე კვირაში ამერიკელ წარმომადგენლებთან მოლაპარაკებები დაგეგმილი არ იყო.