რუსეთში აშშ-ის საელჩოს ინფორმაციით, 31 ოქტომბერს მუზეუმ-ნაკრძალ „ცარიცინოს“ ტერიტორიაზე არსებობდა „ისეთი მოვლენის საფრთხე, რომელმაც შესაძლოა მასობრივი მსხვერპლი გამოიწვიოს“. აშშ-მა შესაძლო ტერაქტის შესახებ რუსეთის უსაფრთხოების ფედერალურ სამსახურს (ფსბ) აცნობა.
რუსეთში აშშ-ის საელჩომ შაბათს, 31 ოქტომბერს, თავის ვებგვერდზე გამოაქვეყნა გაფრთხილება იმავე დღეს მოსკოვის მუზეუმ-ნაკრძალ „ცარიცინოში“ არსებული საფრთხის შესახებ.
„აშშ-ის საელჩომ მოსკოვში მიიღო სარწმუნო ინფორმაცია საფრთხის შესახებ, რომ დღეს, 31 ოქტომბერს, მოსკოვის მუზეუმ-ნაკრძალ „ცარიცინოს“ ტერიტორიაზე შესაძლოა მოხდეს მოვლენა, რომელიც მასობრივ მსხვერპლს გამოიწვევს. მისამართი: დოლსკაიას ქუჩა №1, მოსკოვი, რუსეთი, 115569. აშშ-ის მთავრობა საპასუხო ზომებს რუსეთის ფედერაციის შესაბამის უწყებებთან კოორდინაციით ახორციელებს“, — ნათქვამია საელჩოს განცხადებაში.
ამერიკის დიპლომატიურმა წარმომადგენლობამ მოქალაქეებს მოუწოდა, 31 ოქტომბერს მუზეუმ-ნაკრძალ „ცარიცინოში“ მისვლისგან თავი შეიკავონ. „არ მიუახლოვდეთ აღნიშნულ ტერიტორიას, შეინარჩუნეთ სიფხიზლე და მოერიდეთ ხალხმრავალ ადგილებს“, — ნათქვამია განცხადებაში.
ამასთან, სააგენტო ტასის ცნობით, რუსეთის ფსბ-ზე დაყრდნობით, რუსეთის სპეცსამსახურმა ამერიკული მხარისგან პარტნიორული არხებით მიიღო ინფორმაცია „მოსკოვში ტერაქტის მომზადების შესახებ“.
თავის მხრივ, Telegram-არხმა Baza-მ გაავრცელა ინფორმაცია, რომ მუზეუმ-ნაკრძალი „ცარიცინო“ „სულ მცირე, მომდევნო ორი დღის განმავლობაში“ დახურული იქნება. „ტერიტორიის შესამოწმებლად პარკში კინოლოგები გაგზავნეს. მუზეუმ-ნაკრძალ „ცარიცინოსთან“ მისასვლელი გზები ამჟამად გადაკეტილია“, — აღნიშნულია პოსტში.
აშშ-ის გაფრთხილება რუსეთის სპეცსამსახურებს „კროკუს სითი ჰოლში“ ტერაქტამდე
2024 წლის აპრილში გამოცემა The Washington Post-მა, ამერიკელ ანონიმურ ოფიციალურ პირებზე დაყრდნობით, დაწერა, რომ როდესაც აშშ რუსეთის სპეცსამსახურებს ტერაქტის საფრთხის შესახებ ინფორმაციას გადასცემდა, ის კრასნოგორსკში მდებარე საკონცერტო დარბაზ „კროკუს სითი ჰოლს“ ისლამისტების შესაძლო სამიზნედ ასახელებდა.
გამოცემის წყაროების თქმით, ამერიკულმა სპეცსამსახურებმა მოსალოდნელი ტერაქტის შესახებ ინფორმაცია ფსბ-ს 6 მარტს გადასცეს. მომდევნო დღეს, 7 მარტს, აშშ-ის საელჩომ მოსკოვში გამოაქვეყნა გაფრთხილება რუსეთის დედაქალაქში შესაძლო ტერორისტული თავდასხმის შესახებ. მასში ნათქვამი იყო, რომ საელჩო თვალს ადევნებდა ცნობებს, რომელთა თანახმადაც, „ექსტრემისტები უახლოეს პერიოდში მოსკოვში ადამიანთა მასობრივი თავშეყრის ადგილებზე, მათ შორის კონცერტებზე, თავდასხმებს გეგმავენ. აშშ-ის მოქალაქეებს ურჩევენ, მომდევნო 48 საათის განმავლობაში მოერიდონ ხალხმრავალ ადგილებს“.