სპეციალური პენიტენციური სამსახური ზურა ჯაფარიძის პირობით ვადამდე გათავისუფლების შეთავაზებას დეზინფორმაციას უწოდებს და განცხადებას ავრცელებს.
“სასჯელის მოხდისგან პირობით ვადამდე გათავისუფლებასა და სასჯელის მოუხდელი ნაწილის უფრო მსუბუქი სახის სასჯელით შეცვლასთან დაკავშირებულ საკითხებს იხილავს სამსახურის ადგილობრივი საბჭო.
მოქმედი კანონმდებლობა ითვალისწინებს, შესაბამის ეტაპზე მსჯავრედებულთა ინფორმირებას პირობით ვადამდე გათავისუფლების ან მოუხდელი სასჯელის უფრო მსუბუქი სახის სასჯელით შეცვლის, კანონით დადგენილი წესის შესახებ. ზურაბ გირჩი ჯაფარიძის შემთხვევაშიც, სპეციალური პენიტენციური სამსახურის მსჯავრდებულთა რესოციალიზაცია რეაბილიტაციის დეპარტამენტის მოსამსახურის მიერ, მოქმედი კანონმდებლობისა და შესაბამისი პროცედურების დაცვით მას მიეწოდა ინფორმაცია აღნიშნული წესის შესახებ.
გასაუბრების შედეგად შედგენილ იქნა ოქმი, რომლის თანახმადაც მსჯავრდებულმა ზურაბ გირჩი ჯაფარიძემ უარი განაცხადა მისი დახასიათების საბჭოსათვის გადაგზავნის თაობაზე.
აქვე უნდა აღინიშნოს, რომ პირობით ვადამდე გათავისუფლების საკითხის განხილვა ხორციელდება საქართველოს კანონმდებლობით დადგენილი წესის შესაბამისად და საკითხის განხილვა არ არის დამოკიდებული მსჯავრდებულის სურვილზე და გადაწყევტილება მიიღება პენიტენციური სამსახურის ადგილობრივი საბჭოს მიერ, კანონმდებლობით განსაზღვრული კრიტერიუმების საფუძველზე.
რაც შეეხება სპეციალური პენიტენციური სამსახურის მხრიდან ზურაბ ჯაფარიძისთვის ან რომელიმე სხვა მსჯავრდებულისთვის პირობით ვადამდე გათავისუფლების შეთავაზებას, აღნიშნული წარმოადგენს დეზინფორმაციას.” – ნათქვამია გავრცელებულ ინფორმაციაში.
კოალიცია ცვლილებისთვის ერთ-ერთი ლიდერის, ზურაბ ჯაფარიძის Facebook გვერდზე გამოქვეყნებულ პოსტში ეწერა, რომ ჯაფარიძეს შესთავაზეს პირობით ვადაზე ადრე გათავისუფლებლების უფლებით სარგებლობა, თუმცა მან უარი განაცხადა.
