იტალია და საფრანგეთი ეჭვით უყურებენ ევროკომისიის წინადადებას, რომელიც უკრაინის წინააღმდეგ საბრძოლო მოქმედებებში მონაწილე რუსეთის მოქალაქეებისთვის ევროკავშირში შესვლის აკრძალვას ითვალისწინებს. ამის შესახებ ხუთშაბათს, 25 ივნისს, Bloomberg-ი წყაროებზე დაყრდნობით წერს.
ეს აკრძალვა რუსეთის წინააღმდეგ ევროკავშირის სანქციების 21-ე პაკეტის ნაწილია, რომელიც ევროკავშირის წევრებმა 26 ივნისს უნდა განიხილონ. Bloomberg-ის წყაროების განმარტებით, პარიზი და რომი არ ეწინააღმდეგებიან რუსი სამხედროებისთვის შესვლის აკრძალვას, თუმცა შიშობენ, რომ აკრძალვის ამჟამინდელი ფორმულირება შესაძლოა ყველა რუსეთის მოქალაქეზე გავრცელდეს.
კერძოდ, ევროკავშირის ამ ორმა ქვეყანამ აღნიშნა, რომ აკრძალვის ამოქმედების შემთხვევაში გადაწყვეტილება იმის შესახებ, ვინ იბრძოდა უკრაინის წინააღმდეგ და ვინ — არა, კონკრეტულმა ევროკავშირის სახელმწიფოებმა უნდა მიიღონ, რაც მათთვის მარტივი არ იქნება.
გამოცემის ცნობით, რუსეთის ყოფილი კომბატანტებისთვის ევროკავშირში შესვლის შესაძლო აკრძალვა იმ ზომების ნაწილია, რომლითაც ევროკავშირი ცდილობს მოსკოვს მოლაპარაკებების დაწყებისკენ უბიძგოს იმ პირობებში, როცა უკრაინის მდგომარეობა ფრონტზე უმჯობესდება.
თუმცა უკრაინაში ომის მონაწილეებისთვის შესვლის შესაძლო აკრძალვა ერთადერთი საკამათო საკითხი არ არის. დამკვირვებლების შეფასებით, პრობლემური შეიძლება აღმოჩნდეს რუსულ ნავთობზე ფასის ზედა ზღვრის კონტროლიც, განსაკუთრებით ნავთობის ამჟამინდელი მაღალი ფასების ფონზე.
ევროკავშირის სანქციების 21-ე პაკეტი რუსეთის წინააღმდეგ
ევროკომისიის ხელმძღვანელმა ურსულა ფონ დერ ლაიენმა რუსეთის წინააღმდეგ ევროკავშირის ანტისაომარი სანქციების 21-ე პაკეტი 9 ივნისს წარადგინა. მასში, სხვა საკითხებთან ერთად, შედის უკრაინის წინააღმდეგ რუსეთის ომში მონაწილე პირებისთვის ევროკავშირის ტერიტორიაზე შესვლის აკრძალვა. ევროკომისია სთავაზობს წევრ ქვეყნებს, ევროკავშირში შესვლა აეკრძალოს ყველას, ვინც უკრაინის წინააღმდეგ სრულმასშტაბიანი ომის დაწყების შემდეგ რუსეთის შეიარაღებულ ძალებში მსახურობდა.
„ევროპა დახურული რჩება ყველასთვის, ვინც უკრაინაში შეჭრაში მონაწილეობდა“, — განაცხადა ფონ დერ ლაიენმა ჟურნალისტებთან საუბრისას. სხვა შეზღუდვები უნდა შეეხოს ენერგეტიკას, ფინანსურ სექტორს, ვაჭრობას და პირველად — თევზჭერასაც.
ახლა პაკეტი ევროკავშირის ქვეყნებმა ერთხმად უნდა დაამტკიცონ. ევროკომისიის წარმომადგენლები არაერთხელ აღნიშნავდნენ, რომ ყოველი ახალი სანქციური პაკეტის მომზადებისას ბრიუსელი ცდილობს არსებული ხარვეზების დახურვას და რუსეთზე ზეწოლის გაძლიერებას. ევროკავშირის მიზანია მაქსიმალურად შეზღუდოს ის შემოსავლები, რომლებიც რუსეთს უკრაინის წინააღმდეგ ომის გაგრძელების საშუალებას აძლევს.