30 ივნისს, ღამის 4 საათზე, მოსკოვსა და მოსკოვის ოლქზე დრონებით მასირებული შეტევა განხორციელდა. დედაქალაქის მერის, სერგეი სობიანინის განცხადებით, საჰაერო თავდაცვის ძალებმა დაახლოებით 50 უპილოტო საფრენი აპარატი ჩამოაგდო, რომლებიც მოსკოვისკენ მიფრინავდნენ — ინფორმაციას Ukrayinska Pravda ავრცელებს.
შეტევის გამო რუსეთის საჰაერო ტრანსპორტის ფედერალურმა სააგენტომ (როსავიაციამ) დილის 7 საათისთვის დომოდედოვოსა და ჟუკოვსკის აეროპორტებში ფრენების დროებითი შეზღუდვა გამოაცხადა.
ტელეგრამ-არხ Exilenova-ს მონაცემებით, აფეთქებები და ხანძარი დაფიქსირდა მოსკოვის ოლქის ქალაქ ეგორიევსკში, ხოლო ქალაქ დუბნაში ორი დარტყმის შესახებ ცნობები გავრცელდა.
დუბნაში მდებარეობს კომპანია „კრონშტადტის” საწარმოო ობიექტი, რომელიც სამხედრო დანიშნულების უპილოტო საფრენ აპარატებს — მათ შორის „ორიონისა” და „ინოხოდეცის” სერიის დრონებს — აწარმოებს. ამავე ქალაქში მდებარეობს ასევე ბერეზნიაკის სახელობის „რადუგას” სამანქანათმშენებლო ქარხანა, რომელიც Kh-101, Kh-555, Kh-69 და Kh-59MK კლასის საკრუიზო რაკეტებს უშვებს — ანალოგიური ინფორმაცია, „კრონშტადტისა” და „რადუგას” ობიექტებზე უკრაინული დრონების წინა შეტევების შესახებ, ადრეც არაერთხელ გავრცელებულა საერთაშორისო მედიასაშუალებების მიერ.
რუსეთის ხელისუფლებამ ჯერჯერობით ოფიციალურად არ დაადასტურა, ჩამოაგდეს თუ არა ყველა დრონი და რა ზიანი მიადგა მოსკოვის ოლქის ობიექტებს.