შავ ზღვაში რუსეთისა და უკრაინის თავდასხმების რაოდენობის ზრდის გამო, თურქეთი სავაჭრო გემების გადაადგილებაზე შეზღუდვებს აწესებს. ამის შესახებ შაბათს, 8 აგვისტოს, Bloomberg-მა წყაროებზე დაყრდნობით გაავრცელა ინფორმაცია.
წყაროების ცნობით, თურქეთის სანაპირო უსაფრთხოების გენერალურმა სამმართველომ ნოვოროსიისკისკენ მიმავალ რამდენიმე გემს აცნობა, რომ ასეთი რეისებისთვის ტრანზიტის ნებართვებს აღარ გასცემს. უწყებამ ასევე განაცხადა, რომ დარდანელის სრუტის გავლით გადაადგილების განაცხადების განსახილველად დამატებითი დრო სჭირდება.
ანკარამ მანამდე უსაფრთხოების ზომების გაძლიერებისკენ მოუწოდა მხარეებს სავაჭრო გემებზე, მათ შორის თურქული კომპანიების კუთვნილ ხომალდებზე, თავდასხმების მკვეთრი ზრდის ფონზე.
თურქეთის ტრანსპორტის სამინისტრომ Bloomberg-ის კომენტარის მოთხოვნას არ უპასუხა.
თურქეთის საგარეო საქმეთა სამინისტრო გემების უსაფრთხოების უზრუნველსაყოფად ზომების მიღებას ითხოვს
ამ კვირის დასაწყისში თურქეთის საგარეო საქმეთა სამინისტრომ განაცხადა, რომ თურქული კომპანიების კუთვნილ ორ გემზე დრონებით განხორციელებული თავდასხმების შედეგად ეკიპაჟის წევრები, მათ შორის თურქეთის მოქალაქეები, დაშავდნენ.
„კიდევ ერთხელ მოვუწოდებთ ყველა დაინტერესებულ მხარეს, განსაკუთრებით კი ომში მონაწილე მხარეებს, დაუყოვნებლივ მიიღონ კონკრეტული ზომები შავ ზღვაში ნაოსნობის უსაფრთხოების უზრუნველსაყოფად“, — განაცხადა უწყებამ 4 აგვისტოს.
თურქეთის საგარეო საქმეთა სამინისტროს განცხადებით, ესკალაციას შესაძლოა მოჰყვეს „მრავალმხრივი უარყოფითი შედეგები“, მათ შორის სურსათის უსაფრთხოებისთვის.
Bloomberg-ის წყაროს თანახმად, შეზღუდვები უკრაინის მიმართულებით მიმავალ გემებზეც ვრცელდება.
ამასთან, ადგილობრივი დროით 13:00 საათისთვის ბულგარეთისა და თურქეთის პორტებისკენ მიმავალი გემები დარდანელის გავლით ჩრდილოეთის მიმართულებით მოძრაობას კვლავ აგრძელებდნენ.
თავდასხმები შავ ზღვაში
უკრაინის უპილოტო სისტემების ძალებმა 6 ივლისიდან ოპერაცია „МоЛоЧКа“-ს ფარგლებში შავ ზღვაში რუსეთის 75 ტანკერი დააზიანეს. ამის შესახებ 30 ივლისს უპილოტო სისტემების ძალების სარდალმა რობერტ „მადიარ“ ბროვდიმ Telegram-ზე განაცხადა.
ივლისის პირველი ორი კვირის განმავლობაში რუსეთმა უკრაინის პორტებზე, მათ შორის ოდესის ოლქში, 23 დარტყმა განახორციელა და შავ ზღვაში სამოქალაქო გემებს 17-ჯერ დაესხა თავს.
ამის გამო უკრაინის აგროექსპორტი საფრთხის ქვეშ აღმოჩნდა. საზღვაო კორიდორში მოძრაობა ფაქტობრივად შეჩერდა, ხოლო ალტერნატიული მარშრუტები მის სრულად ჩანაცვლებას ვერ ახერხებენ.
