“დირსში” შეჭრილმა დევნილებმა ტერიტორია დატოვეს

თბილისში, კომპანია „დირსის“ მიერ აშენებული საცხოვრებელი კომპლექსი ყველა დევნილმა დატოვა.

მოლაპარაკება შეთანხმებით დასრულდა, შეჭრილმა მოქალაქეებმა კორპუსიდან გასვლის გადაწყვეტილება გვიან ღამით მიიღეს. კორპუსის დატოვებას წინ უძღოდა მოლაპარაკებები საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროში.

დევნილთა ინფორმაციით, მიიღეს დაპირება, რომ სამინისტრო ყველა მათგანის მდგომარეობაზე ინდივიდუალურად იმსჯელებს და უახლოეს ხანში მოხდება საცხოვრებლით უზრუნველყოფა.

„დირსის“ კომპლექსში შესული 150-მდე დევნილი ოჯახიდან ნაწილმა შენობა 2 აპრილს დატოვა. დანარჩენები შენობაში რჩებოდნენ და ბინებით დაკმაყოფილების მოთხოვნით შიმშილობის დაწყებას აპირებდნენ.

საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტრომ წელს ივნისში, თბილისში კიდევ 800-მდე დევნილ ოჯახს უნდა გადასცეს „დირსისგან“ და სხვა სამშენებლო კომპანიებისგან შესყიდული ბინები.

ახალი ბინებით დაკმაყოფილება კონკრეტული კრიტერიუმების მიხედვით ხდება. მათ შორისაა დევნილთა ამჟამინდელი საცხოვრებლის მდგომარეობა და სულადობა. უპირატესობა ენიჭებათ მრავალშვილიან ოჯახებს და შშმ პირებს.