ნუგზარ და ანა ბაგრატიონ-გრუზინსკებმა დავით ბაგრატიონ-მუხრანელს სასამართლოში უჩივლეს.მოსარჩელე მხარის უფლებადამცველი იურიდიული კომპანიის ინფორმაციით დავა “დავით ბაგრატიონ-მუხრანელის წინააღმდეგ საქართველოს სამეფო სახელის უნებართვოდ სარგებლობის აღკვეთას ეხება.
იურიდიული კომპანია საქმესთან დაკავშირებით განცხადებას ფეისბუქ გვერდზე აქვეყნებს:
“სასამართლო დავა ნუგზარ და ანა ბაგრატიონ გრუზინსკები დავით ბაგრატიონ მუხრანელის წინააღმდეგ ‼️‼️‼️
როგორც საზოგადოების გარკვეული ნაწილისათვის უკვე ცნობილია, თბილისის საქალაქო სასამართლოში მიმდინარეობს სამოქალაქო დავა დავით ბაგრატიონ მუხრანელის წინააღმდეგ საქართველოს სამეფო სახლის სახელის უნაბერთვოდ სარგებლობის აღკვეთის თაობაზე.
დავის სირთულიდან გამომდინარე, თბილისის საქალაქო სასამართლო დავას განიხილავს კოლეგიური (სამი მოსამართლის) შემადგენლობით – მაია გიგაური (თავმჯდომარე), თამარ ლაკერბაია, გიორგი გოგიჩაშვილი.
მომდევნო სხდომაზე დაგეგმილია სპეციალისტების სტატაუსით მოწვეული ისტორიულ მეცნიერებათა აკადემიკოსების – როინ მეტრეველისა და გიორგი ოთხმეზურის გამოკითხვა.
სასამართლო სხდომები საჯაროა და დაინტერესებულ პირებს აქვთ შესაძლებლობა თავისუფლად დაესწრონ. სხდომა გაიმართება ა.წ. 12 მარტს 15:00სთ-ზე, თბილისის საქალაქო სასამართლოს #42 სხდომათა დარბაზში.
მოსარჩელეების ნუგზარ და ანა ბაგრატიონ გრუზინსკების ინტერესებს სასამართლოში იცავს იურიდიული კომპანია „სამართლის გზის“ მმართველი პარტნიორი, ადვოკატი ლევან გორელაშვილი. “ – წერია განცხადებაში.
ანა ბაგრატიონ გრუზინსკიმ და დავით ბაგრატიონ მუხრანელმა პატრიარქის ინიციატივით 2009 წელს იქორწინეს. მათ ჯვარი წმინდა სამების საკათედრო ტაძარში დაიწერეს. ეკლესია არ მალავდა , რომ ეს ქორწინება საქართველოში მონარქიული წყობილების აღდგენის საფუძველი უნდა ყოფილიყო და ბაგრატიონების ორი შტოს ქორწინებით გაერთიანება ამიტომაც მოხდა, რათა ამ ქორწინებაში დაბადებული ბავშვი ბაგრატიონთა ტახტის მემკვიდრე გამხდარიყო.თუმცა სამეფო ოჯახმა დიდხანს ვერ გაძლო. წყვილი მალევე დაშორდა ერთმანეთს.
გარკვეული დროის შემდეგ სამეფო წყვილი შერიგდა და 2011 წელს მათ შვილი – გიორგი ბაგრატიონ–ბაგრატიონი შეეძინათ. ბავშვი მადრიდში დაიბადა. მისი დაბადებით ბაგრატიონთა ორი შტო – გრუზინსკები და მუხრანელები შეიკრა და ამიტომაც ბავშვი ბაგრატიონი–ბაგრატიონის გვარს ატარებს. 2013 წელს ბავშვი პატრიარქმა მონათლა და ბაგრატიონთა დინასტიის მემკვიდრედ გამოცხადდა.
ჯერჯერობით უცნობია დავის დეტალები. მოპასუხე მხარის უფლებადამცველი აცხადებს, რომ საქმე აბსურდულია და არანაირი სამართლებრივი საფუძველი არ გააჩნია.
