“ჩვენი შორი რადიუსის შესაძლებლობების მასშტაბები მოსკოვის რეგიონმა იგრძნო” – დღეს დილის საათებში მოსკოვში, კრემლიდან 15 კილომეტრში მდებარე ნავთობგადამამუშავებელ ქარხანაზე უკრაინული დრონებით დარტყმას პრეზიდენტი ვოლოდიმირ ზელენსკი X-ზე გამოეხმაურა:
“ამჯერად მოსკოვის რეგიონმა იგრძნო უკრაინის შორი რადიუსის შესაძლებლობების მასშტაბები. 500 კილომეტრის დაშორებით ნავთობქარხანას დავარტყით. რუსეთს უნდა ვაიძულოთ, რომ ჩვენი ხალხის წინააღმდეგ ომი დაასრულოს და უკრაინის შორი რადიუსის შეიარაღება ამ წნეხის ერთ-ერთი ყველაზე მნიშვნელოვანი კომპონენტია. ეს რუსულ იერიშებსა და ომის გაჭიანურებაზე სამართლიანი პასუხია.” – დაამატა უკრაინის პრეზიდენტმა.
დაზიანებული ობიექტი ეკუთვნის Gazprom Neft-ს. ქარხანა მოსკოვის რეგიონში ყველაზე მსხვილი ნავთობგადამამუშავებელი საწარმოა. არსებული მონაცემებით, 2024 წელს მან 11.6 მილიონი ტონა ნავთობი გადაამუშავა, მათ შორის 2.9 მილიონი ტონა ბენზინი და 3.2 მილიონი ტონა დიზელის საწვავი აწარმოა.
შემთხვევის შედეგად არავინ დაშავებულა და ადგილზე საგანგებო სამსახურები მუშაობენ. მოსკოვის მერს, სერგეი სობიანინს არ დაუკონკრეტებია, იმოქმედა თუ არა თავდასხმამ ქარხნის საქმიანობაზე.
